U Yawnan a İmarat Caraboye Mhayde gseymi tadbiqat folhoyo mşawtıfo

U Yawnan wa İmarat Caraboye Mhayde, gıdsaymi tadbiqat mşawtıfo. Mawdıc da hayle oyaroye da 2 athrawotho, gıdsaymi u tadbiqatano qariwo li gozarto d’Grit.

 U tadbiqano dgımşare bi şabthathe dıbqamuthayna, kmisım b’zabno dıkquşyo i mwatyutho beyn du Yawnan u du athro şbobo Turkiya cali sbutho du yamo Mescoyo.

A İmarat Caraboye Mhayde, mşadare a tayosyothayde du qrobo d’F-16  lı foqudutho oyaroyto dkıtyo bi gozarto d’Grit bu tayemno du Yawnan, leşan dmıştawtıfi bu tadbiqat folhoyo mşawtıfo dıgmisım ba kımo yawme dıbqamuthayna. U tadbiqatanoste sim bu taro di methcadronutho dkito beyn da wazirwotho du sutoro u di baroyutho da 2 athrawotho.

Mşalo du gayso du Yawnan makadle, da hayle oyaroye gıdmaşın droşe folhoye mşawtıfe cama hayle oyaroye da İmarat Caraboye wu tadbiqatanoste kmisım, bu zabno dkımdawmo i mwatyutho beyn di şultonutho d’Athena u d’Ankara cali sbutho da zedqe du enerji dkito bu yamo Mescoyo.

A İmarat Caraboye Mhayde saqıbloyene l’Turkiya wu beyn du Yawnan u Turkiyaste kito heş mu maktabzabno bcelıdbobutho bu haqlo folitiqoyo Maşılmono. Dubai  u Ankara kısundi a hayle di şultonutho d’Fayez al Sarraj d’Libya ubebzabno, Turkiya mahwela hfuxyo lu qyomo dhawi beyn da İmarat Caraboye u İsroyel.

U waziro di baroyutho du Yawnan Nikos Dandias mawdacle, dhawile mamlo bu telefon camu baramnayde da İmarat Şex Abdullah bin Zayed al Nahyan cali sbutho di methcadronutho dbeynothaye bu haqlo da şwole qlimoye u di aykanoyutho du yamo Mescoyo. Bebzabno u waziro di baroyutho d’Amerika Mike Pompeo gıdsoyım socurutho la İmarat Caraboye u l’İsroyel leşan u droşo dcalu İran wu Sin.