U Zawco Demoqratoyo Othuroyo maglele cali hzayto folitiqoyto dkıtle, bnişo dmişarrıro i şawtofutho umthoyto bu qlimo d’Kurdistan du Ciraq

CIRAQ – I hzayto folitiqoyto du Zawco Demoqratoyo Othuroyo kımmathlo xarita qrihto du darbo, laf şawtofutho aminoyto ub’kinutho dıksaymo u garanti di şawyutho, udkımyaqro a’gawne umthoye u tawdithoye u marduthoye mşahılfe bu qlimo d’Kurdistan du Ciraq. 

Zawco Demoqratoyo Othuroyo bi hzaytayde ste i folitiqoyto, kım’akıd di şawtofutho şarirto latyo balhude masırto cami mathlonutho remzonoyto, elo i şawtofutho masırtoyo cama zedqe folitiqoye, marduthoye, momunoye, kenşoye udi mdabronutho b’şıkıl kulonoyo, bnişo dmisım u garanti du dewam di şkihutho udu quyomo du camaydan u Kaldoyo Suryoyo Othuroyo bu cafrayde u makthabzabnoyo. 

Bebzabno, i hzayto folitiqoyto du Zawco Demoqratoyo Othuroyo mşalatla bahro cala şıklat kulle di dhılmiye dhawyo udheş kımdawmo dhuyo bhaq du camaydan dıkcoyış bu qlimo d’Kurdistan. 

Calalthe, Zawca sımle qroyto la rişone folitiqoye d’Kurdistan dkloın çıddi cali hzayto folitiqoyto dhawile bi sbutho du camaydan, udfıhmi u şıkıl di casqutho dıkcaşla u camaydan, udfılhi laşan dımqafın ele şroye.