UNİSEF sımla qroyto la athrawotho kulle dmadcıri abnaymothoyathe dkıtne msike b’Alhol

İ mtakasto d’Unisef d’Emwotho Mhaydotho, tlıbla ma athrawotho kulle dmadcıri abnaymothoyathe dkıtne msike b’gawıd di maşritho d’Alhol bu garbay madınho d’Suriya.

U talab d’Unisef athi luhwoyo bıthır mu yuqdono dhawiwo i şabtho dşaficina bi maşritho d’Alhol, udıqtılwo ebe tlotho nacime.

U mdabrono qlimoyo d’Unisef dcalu madınho mescoyo wu garbiyo d’Afriqya Ted Chiban, mawdacle di maşritho d’Alhol dkıtyo bu garbay madınho d’Suriya, khuyo ğalabe yaqrotho dıkmisım texmin dkıtne ma tuhmonoye mzayne dı Dacış d’Suriya udu Ciraq. Chiban mawdacle ste d’zıd m’22 alfo nacime nuxroye dkıtne m’60 ğensıwotho mşahılfe kcayşi ucdo ba maşıryotho uba hbuşye, u acmaye ste kito olufe d’nacime Suriye.

U mşalo emwothoyo d’Unisef mırle ste “a’nacime di maşritho d’Alhol camgabıd dımlakıh u gwinaththe bu ışmo dı Dacış, kcayşi ste bu taro d’şartat ğalabe qaşye di ciyeşe, mawxa klozım an’athrawotho hadome d’Emwotho Mhaydotho dsaymi u mede dıknofıl aclaye, bnişo dmitadcıri a’nacime bı mşaynutho la n’athrawothaththe udhowın hfite m’hatho b’gawıd da kenşaththe”.

Bu yuqdono dhawiwo yawme d’şabtho dşaficina b’gawıd kunoşo da galwoye Suriye bi maşritho d’Alhol, qtılwo hdo athto u tlotho nacime, ubu noquso 11 hrene mçarhiwo.

Bu yarho dşaficina ste, hın ma yadıcthone da zedqe noşoye d’Emwotho Mhaydotho mawdacwolın dkito menyono dlatyo mbayno qtili b’gawıd da maşıryothaththe d’Alhol ud’Roç bu garbay madınho d’Suriya.

İ maşritho d’Alhol dıknıflo bu madınho di mditho di Hasake, ksaymo baytoyutho l’alfayo d’yaqrotho dı Dacış cama nacimaththe dkıtne m’Suriya umu Ciraq, ukitoste b’gawıd di maşritho olufe hrene d’yaqrotho da nuxroye dı Dacış d’athınwo m’zıd m’50 athrawotho dıbritho. İ amşrithathe d’Alhol kmisomo duyoqo qaşyo di mşaynutho ma haylawotho d’Suriya demoqratoyto d’QASAD.