Urifi sxırla a tarceyda mqabıl d’Amerika d’Rusya u d’Turkiya

U Huyodo d’Urifi bıthır mıd sxırwole a thumeyde lu mazlo u mathyo du camo, ucdo mıdle fusqono dfotıh a thumeyde ışmo lu mazlo u mathyo dbeyn lhın athrawtho dıbritho.

 U Huyodo d’Urifi bu fusqono dhule, lo ftıhle a tarce lhın athrawotho dıkzoyıd u kewo di Corona ebeye; beynothaye Turkiya.

 Bi sbutho du kewo di Corona, ğalabe athrawotho sxırwolın a tarcathe lu mazlo u mathyo du camo. U Huyodo d’Urifi bıthır mıd mbarbazwo u kewo di Corona sxırwole a tarceyde lıbritho, elo ucdo bu fusqono dmıdle, ftıhle a tarcayde l’mınyono d’athrawotho; beynothaye Australia, Kanada, Yaban, Thailand, Tunıs uğer.

Bu fusqonano u mede dıkgorış u zuhoro, trele u Huyodo a tarcayde sxire lhın athrawotho xıd mathlo Turkiya, Amerika u Rusya. Elo lu Sin gıdfıthile b’şartat du athro dmanhatle la haye. Bi maqırhonutho dhule u Huyodo mawdacle, dan athrawotho dıtrelın a tarce sxire elaye, kmibarbız u kewo d’Corona ğalabe mawxa lo kubci dfuthi a tarcathe lu camo.

Bi sbuthathe bi qamayto mahıtlın Turkiya bi lohitho du ftoho da tarce, elo bıthır mawfqo mi listathe, mayna celothoyo lo mawdıc. Bu şıkılano anathrawotho d’Urifi mşarelın naqla hreto dfuthi a tarcathe lu camo dıqodır dsoyım socurutho lıhdode ışmoste dhowe.