USUP kımdawım dmahwe u hfuxyayde mqabıl di şultonutho d’Lebnon

U gabo du Huyodo Suryoyo Tibeloyo-USUP kımdawım dmahwe u hfuxyayde mqabıl di şultonutho, du fasad udi aykanoyutho harıwto du momuno d’Lebnon.

 U notarrozo gawonoyo du gabo d’USUP b’Zahle Mişel Mallo, mawdacle du qawmo Lebnono’yo qawmo mqabıl d’zayno lo ruşmoyo’yo dmawbele Lebnon l’aykanoyutho momunoyto mahişonitho.

 A mtagılyone Lebnonoye bi mditho d’Zahle, kımdawmi kul yawmo dsuxri u darbo rişoyo di mditho, udmahwın awyutho cama tagılyotho hrene dıkmitaybi ba fenyotho hrene d’Lebnon. La tagılyothani d’Zahle kula naqla kmıştawtıf mathlone mu gabo du huyodo Suryoyo tibeloyo d’USUP bi rişonutho du notarrozo gawonoyo du gabo sniğro Mişel Mallo.

Mallo dmıştawtafle athmıl blalyo la tagılyotho du protesto b’Zahle hawxa mırle la mikrofone du tboco froso d’Lebnon; Ahna adyawma nahtina la zabuqone, huwwe du şroro a’tagılyothani lıklozım dkolanwo, elo camıhbol mi celtho du virus d’Corona, u fulhono wi ayknoyutho momunoyto çbırla ğalabe camo dımhalqi dawse laxalf, laşan dfılhi ud’maydi nafas m’hatho. Ahna kımnasena d’obina aftho ukımmina balki i aykanoyutho ramhıl dhuyo tawtır, elo i şultonuthathe du fasad kul yawmo dıkşofıc kımthabto dkıbco dıtıfko Lebnon bkulle a’darbone li gihano. Noşo tro dlımıftakır du qawmano balhude qawmo mqabıl du kafnoyo, elo bu asas qawmoyo mqabıl di aykanoyutho folitiqoyto ducdo dmawbılalan laf aykanoyutho momunoyto mahişonitho. İ aykanoyutho folitiqoyto harutoyo cal dkito zayno lo ruşmoyo larwal du taro du athro, awkith u athro nacimo dıxliq b’gawıd du athro rabo d’Lebnon huwweyo dıtrılelan dmarhıqina mu dawraydan u makthabzabnoyo xıd Lebnonoye, dmıfrışina ma n’athrawotho hawrone ud’hedorayna hul dkul noşo dıtrele menayna. İ celtho du mede dathi b’rişayna u gabo d’Hizballa wu zaynaydeyo, ubi betiçe du gabano matina ucdo l’ayknoyutho mahişonitho du momuno. Kıtlan sabro da noşe dmahisi udnıhti la zabuqone. Camıhbol cayni fthotho ucayni farsufe ne dıknıhti kula naqla la zabuqone. 10% mu camo hınne ne dkımnasın dmarmışi u kenşo kule darke, ahna kıbcina 90% drımşi udnıhti la zabuqone.