USUP maslamle imcadronutho du camo li marcitho dı Xuroyo Alyas Jirjıs

U gabo du Huyodo Suryoyo Tibeloyo d’USUP kımdawım dımqadım mcadronwotho noşoye lu camaydan dkıtyo sniqoyo bu taro du kriz momunoyo dıkloqele Lebnon.

Xuroyo Alyas Jırjıs bi socurutho dsımle l’USUP mbaraxle u qentrun du gabo du Huyodo Suryoyo, u maslım ele sahme di mcadronutho du muklo, laşan dımfaraqlın la yaqrotho sniqoye di marcithayde du turo d’Lebnon.

U gabo du Huyodo Suryoyo Tibeloyo d’USUP, kımdawım dloqe rişone da marciyotho du camaydan b’Lebnon, laşan dmaslamlın asahmaththe di mcadronutho du muklo udmifarqo la yaqrotho sniqoye du camaydan bu taro di kampanya dmahıt ışma “mu lebo lu lebo”.

Bu tarano, u notarrozo da sebwotho kenşoye du gabo d’USUP Josef Hajjar msıtaqbele bu qentrun gawonoyo du gabo bi erişkoyto d’Bayrut, xuroyo Alyas Jırjıs dkıtyo u rişono di marcitho di dayro d’Mor Gabriel da Suryoye di fnitho d’Cıjıltun Kısırwan bu turo d’Lebnon.

Li ytawtathe, mıştawtafleste ahadome du mawtbo qentrunoyo du gabo du Huyodo Suryoyo d’USUP. Bu şuroyo di ytawtathe, xuroyo Alyas bi teşmışto dmaqımle bu leşono Suryoyo mbaraxle u qentrun du gabo, u tlıble m’Aloho dnofıq moro lu rişono, li mdabronutho ula hadome du gabo du Huyodo Suryoyo Tibeloyo, udobelın haylo aminoyo laşan dımdawmi u ağunaththe wu snodaththe lu camo Suryoyo ulu athraththe Lebnon.

Bu huthomo di ytawtathe, Josef Hajjar maslamle xuroyo Alyas Jırjıs sahme mi mcadronutho du muklo, laşan dımfaraqla la yaqrotho sniqoye di marcithayde.