USUP mfaraqle mcadronutho momunoyto la yaqrotho sniqoye

U gabo du huyodo Suryoyo tibeloyo d’USUP, maslamle i mcadronutho momunoyto yarhonoyto la yaqrotho sniqoye du camaydan bi mditho dı Tarablos bu athro d’Lebnon.

U rişono d’USUP İbrahim Murad, bi socurutho dsımle li marcitho Suryoyto dı Tarablos, makadle du gabayde gdımdawım dsonıd u camaydan mqabıl da casquwotho dkito bu maşıqlano ducdo.

U rişono du gabo du huyodo Suryoyo tibeloyo d’USUP İbrahim Murad cam taşdarto mu gabo, sımle adyawma socurutho li marcitho Suryoyto d’Mor Afrem bi mditho dı Tarablos bu garbiyo d’Lebnon, u mıstaqbıl mu kohno di marcitho qaşişo Samir Hajjar uma n’abne di marcitho.

Murad bu mamlo dsımle bıthır mu qurobo alohoyo, makadle di mditho dı Tarablos i erişkoyto di ciyeşe mşawtafto şarirtoyo, elo i mdithathe dlımahwılala i şultonutho yasifutho, mati u camayda ucdo lu darğo du kafno, u mırle “adyawma bayn du camayda na laşan dımqadminale b’kul hubo udlo mınne, i mcadronutho momunoyto yarhonoyto, bnişo dfoyış u camaydan thabuto udnofıq moro lu neshonayde, bıthır mıdmadre u camo d’Lebnon lu darğo du kafno mfothıd du fasad da rişone folitiqoye du athro. Ahna lıgıdmaşılmina ruhayna, elo u mrodaydan gdımdawım mqabıl di xiyene, du fasad udu gnowo. Gdımdawmina dsındina u camaydan hul dıtoyım u haşano”.

Bıthır mu mamlo d’Murad, u notarrozo da sebwotho kenşoye d’USUP Josef Hajjar wu kohno di marcitho mfaraqlın a’mcadrınwotho momunoye du yarho dkımqadamlın u gabo du huyodo Suryoyo tibeloyo bu snodo du mawtbo umthoyo d’Bethnahrin d’MUB uda şutosayde, dilonoyith i mtakasto du Slibo Suryoyo udı Şlomo d’Urifi.

İ mcadronuthathe kımqadamla u gabo d’USUP la yaqrotho sniqoye du camaydan b’Lebnon, bu taro di kampanya di tarmitho dmabdiyowole u gabo i şato da 2008.