USUP mqadamle imcadronutho momunoyto dkul yarho la eqrotho du cameydan

U gabo du huyodo Suryoyo tibeloyo d’USUP, mfaraqle athmıl imcadronutho momunoyto dıkmiqadmo kul yarho la yaqrotho sniqoye du camaydan b’Lebnon.

 İ mcadronuthathe dımfarqole USUP cal 150 yaqrotho dkıtne mqayde bi hiğmonutho dı Tur Lebnon, kmiqadmo bu snodo du mawtbo umthoyo d’Bethnahrin d’MUB d’Urifi.

Athmıl mtayıb lqoyto bu qentrun du gabo du huyodo Suryoyo tibeloyo d’USUP dkıtyo bi fnitho d’Sad Albuşriye bi mditho d’Bayrut, u mıştawtaflela i mdabronutho du gabo u hın ma yaqrotho sniqoye du camaydan b’Lebnon. U rişono d’USUP İbrahim Murad bu mamlo du futoho dsımle, mawdacle dmarwıho i tarmitho di mcadronutho dıkhıbşo fayış menyono cletır ma yaqrotho du camaydan dkıtne a’sniqoye rabe dkulle di mcadronutho.

Murad mawdacle ste dımşare bu sistem hatho da fetqe yarhonoye di mcadronutho momunoyto, dıknıflo bu taro da mcadrınwotho da zuze, du muklo udu hulmono dkımqadamla USUP bu snodo da şutose du mawtbo umthoyo d’Bethnahrin d’MUB dkıtne hfite b’Urifi dilonoyith i mtakasto du Slibo Suryoyo.

Murad bu mamlayde mırleste “u gabo d’USUP dıkfolıh laltah du gefo d’MUB, lıgıdobe fsoso la hakome dqıtli tarte naqlat u camaydan, naqla ba furqoce u naqla hreto bu tekfino. Kul qırş dkito bu sanduqo du gabo, gıdmifarıq calu camaydan lfuth i qadmoyutho di sniqutho, u hathe ste bnişo d’hoye u camaydan b’neshono b’gawıd du athrayde. A’rişone folitiqoye hakome mamtelın Lebnon lu iflas, ukımnasın ucdo dmakfıni u camayde, bnişo dımgalwın mu athro yaste dhowe ale bidothaye laşan a’yuthronaththe. Bu zabno dıshif Lebnon bu haqlo momunoyo, kenşoyo, folitiqoyo ubu haqlo di mşaynutho du hulmono, ahna çbırina dmişahılfina l’wazirwotho da sebwotho kenşoye udu hulmono, dilonoyith cal di şultonutho lıksaymo u mede dıkmıtlıb mena laşan u camayda”.

Bebzabno, Murad mawdacle da rişone hakome d’Lebnon kımfarqi a’mcadrınwotho dıkmişadri m’Emwotho Mhaydotho balhude cala moraththe ucala noqufaththe, u grışle ste u zuhoro cali saxtakariye du feroqo du vaxin du virus d’Corona, uba melani mdawamle “u gabo d’USUP lfuth a’mkone dkıtle gıdkole camgabıd dkul sniqoyo dlo furşono du mathhab, cal du fulhono noşoyo klozım dhowe banyo calu asas da timoyotho da n’axlaq udi hubo. USUP gabo şaryoyo momunoyith u folitiqoyith, ulıkqathle mcadronutho lo m’athro uloste m’tukoso, balhude kmısnıd ma şutose du camo Suryoyo”.

Bu huthomo du mamlayde, Murad mqadamle a’tawdiyothayde l’MUB, lu Slibo Suryoyo, ula n’abne du camo Suryoyo wa şutosayde dkıtne bi golutho udıkmıştacın dawro noşoyo asasi bu snodo du mrodo dıkmahwele u camaydan laşan dımdawım dfoyış b’Lebnon uba n’athrawotho hrene du madınho.

Bıthır mathe, i mcadronitho du rişono du gabo d’USUP mgabyonitho Layla Latte wa hadome di notarrozutho da sebwotho kenşoye, mfaraqlın a’mcadrınwotho da zuze cal 150 yaqrotho sniqoye dkıtne mqayde bi fnitho d’Sahıl Almatın b’Tur Lebnon. Uba yawme dıbqamuthayna gıdmifarıq mcadrınwotho hrene cala yaqrotho du camaydan dıkhoyın bi mditho d’Bayrut ub’Zahle ub’Tarablos.