Utboco froso urifoyo grıshle u zuhoro cali aykanoyutho lo towto du cameydan b’Turabdin

U msoko wu veyoco da Suryoye d’Turabdin, grışle u zuhoro du tbocofroso d’Urifi mawxa i sfaryawmo d’Almanya Deutsche Welle sımla maqıblonwotho cama mşale du cameydan u hulın a hzayothathe cali aykanoyutho harayto du cameydan.

 Bi sagiyutho da mamle, mahwelın di şultonutho d’Turkiya abico dmazico caynothe du cameydan mawxa hawın a msoke du dayroyo, du mgabyo di qritho d’Arkah uda farsufe hrene.

İ sfaryawmo Almanoyto bi qamayto sımla maqıblonutho camu mgabyo di qritho d’Kafro Aziz Demir dmahkele, dkıtyo ha ma dacore qamoye l’Turabdin bıthır mi golutho dmaxlewola i qritho. U mgabyo komır;U msoko du dayroyo latyo zıtıır mu tezico da Suryoye, metul di şultonutho lo mahwela dkıtyo sanıdto da Suryoye,  mathlo inaqla ahna a Kafroye dı dacirina, i şultonutho lo mcadarlalan hatta i arcoyutho du tecmiro ahna a 16 yaqrotho kull ha hulan 10 alfo euro, leşan dsayminala, u darbo du halxo d’bayn di qritho-ahna sımlan.

Demir mırle; Latwe me zabno inaqla dsımlan u Qdoşo di citaydan di qritho, a istihbarat mırlın tro u qoyumo du cameydan Tuma Çelik lo hodır- inaqla dothe’ste hiye kıtocın i mşalutho du mathyeyde. A melani macjazali-xıd ha marhıbono ksaymi mucamala acme qay hiye latyo qoyumo, U xıdani sebwotho ğalabe, mawxa u camo Suryoyo maklele u dcoreyde u lıkhoze ruhe thnihoyo bu athro. En ono harke barmothoyo du athranono, inaqlayo klozım dobe a zedqeydi kamile, mathlo qay u leşono Suryoyo latyo leşono ruşmoyo.

Bi maqıblonutho dsımla i mğaltho Almanoyto camu rişono du Federasyon da Hudre Suryoye SUDEF Evgil Turker mahwele du msoko du dayroyo zuhoro abici dobın lu cameydan leşan dmazıcile. Bu zabno da msoke ha ma farsufe dımşayalwo cala msoke me Ankarayo. Turker komır; U msoko wu tehito d’ido cala mulkone di dayro d’Mor Gabriel u du cameydan latne star me tezico u lawın manfıcone li şultonutho, elo metul du gabo d’AKP kıtle tarmitho di Maşılmonutho, mawxa kowın a sebwothano, dlo aydarbo kiban mtargmina i sbutho d’Mor Gabriel dmahıt ido cala arcothaydan.

Me gabo hrene bi maqıblonutho dsimo camu rişono du waqıf di dayro d’Mor Gabriel Quryaqus Ergun komır; A Suryoye thniyone bu zabnano, star me komo qetre dkowe, wa Suryoye idici zıttır me kull zabno, bu zabno di şultonutho d’AKP, i sbutho da msokani dhawın bi haraytathe wu weyoco di iqartho du kohno Ramzi Diril lo kudcina mınyo.

U rişono d’SÜDEF Evgil Turker cali sbutho du msoko du dayroyo komır; Ono kmıtyaqano dhın farsufe marke me Turabdin sımlın hboso calu mqimdino leşan dsoyım a msokani, metul i sbutho du dayroyo sbutho dhawiwo mamlo acla bi şato da 2018 latyo hathto. Bi maqırhonutho dsimo camu fatıryraxo di cito Armnoyto Sahak Maşalyan kımtahbıt da Mşihoye gawonoyith latne thnihoyo metul d’Turkiya bi ruşmoyutho u bu sucrono lo mawdele lo ba Armnoye uloste ba came hrene dkit, walaw lfuth u qyomo d’Lozan kıtte zedqe elo hani lo manhıti la haye.