16/09/2021

Vilda Simon dkıtyo mi mditho dı Tel Tamır mawdacla dı Turkiya ba hçome dıksaymolın kıbco dmaxliyo i fnitho ma came şerşoye di duktho

Athto Othuroyto mu camaydan di mditho dı Tel Tamır, mawdacla du gabo kaboşo dı Turkiya ba hçome dıksamlın cala fenyotho du garbay madınho d’Suriya, kıtle u nişo dmaxle i fnitho ma came şerşoye di duktho.

Vilda simon dkobo hul ucdo ağuno mqabıl da şartat casqe di mditho dı Tel Tamır, bi maqırhonutho dhula lu tboco froso, makadla dgıdfayşo masırto camu cafro da n’abohothayda, ulıgıdtıryole fako fşito la haylawotho kaboşe dı Turkiya.

U gayso kaboşo dı Turkiya wa çatawiyayde dıkqorın ruhaye bu ışmo “u gayso athronoyo d’Suriya”, kımdawmi mu siqumo d’19 bu yarho dı Tışrın u Qadmoyo di şato da 2019 uhul ucdo, dsaymi hçome b’şıklat mşahılfe b’tayisyotho dlo pilot, b’soruhe ub’topat cala fenyotho du garbay madınho d’Suriya Tal Tamır, Zarkan u Cayn Cisa, elo ba zabne haroyani Turkiya maqşela naqla hreto a’hçomayda cala qıryawotho du camaydan du Xabur udi mditho dı Tel Tamır.

Cali sbuthathe, i sayirto d’Hawar laqyo athto Othuroyto mu camaydan dı Tel Tamır dışma Vilda Simon, uhula i hzayto dkıtla cala hçome dıksoyım u gayso kaboşo dı Turkiya.

Vilda mawdacla da hçome dıkmisomi adyawma calu Xabur u Tel Tamır, tekrar di tahrazto da hçome marıhbone dsımwole Dacış cala qıryawotho du Xabur bi şato da 2015, u mırla “kımnasın dmawfıqi u mede dfayış mu camo Othuroyo di fnitho, ukıbci dmacşilan bu muzoğo d’cayni gedşe mahişone dcayşinawolın bi şato da 2015. Fayış kamhsina kul yawmo calu qolo da topat uda foqucwotho, kzaycina u kowina stress. İ sbutho di mşaynutho zuctho dilonoytoyo cal dkıtno emo d’nacime uk’foyış kul naqla lebi aclaye”.

Camgabıdathe, Vilda makadla dhınne lıgıdtorın u cafraththe mıqqa dqoşın a’hçome Turkoye cal Tel Tamır, elo gdımdawmi dmitasri camu cafro da n’abohothaththe huli qatinto harayto, uba melani mdawamla “i fnitho kmisım hçome acla b’şıkıl yawmonoyo, u ahan b’şıkıl kyonoyo gdımdawmina a’hayaydan. Kıbcono dmitarkıwo i mşaynutho harke, ukıbcono ste d’yurwi a’nacimaydi harke bu duktho dmawlıdi eba. Ud’howe acli ıno ba haye lıgıdtıryono u cafraydi”.

İ barmothoyto Othuroyto bu huthomo di maqırhonuthayda, sımla qroyto l’Emwotho Mahydotho dsaymi hboso cal Turkiya, laşan dmakılyo a’hçome barbroye dıksaymolın cala qıryawotho du Xabur udı Tel Tamır.

Check Also

USAİD kımdawım d’sonıd u maşıqlo du bnoyo u du hethotho di daşto d’Ninwe

U tukoso Amerikoyo du quyomo Emwothoyo-USAİD, kımdawım d’sonıd u maşıqlo du bnoyo u du het…