Vladimer Putin sımle socurutho qamayto lu qlimo d’Korsk. U gayso d’Rusya mawdacle dmadrele hedor d’160 taysiyotho Ukrainoye dlo pilot b’zabno d’12 şoce

RUSSIA / UKRAINA – U Kremlen mawdacle du rişqutno Vladimer Putin mabdele adyawma socurutho lu qlimo d’Korsk dıknofıl bu macırbo d’Rusya, wi socuruthathe i qamaytoyo dıksamla Putin li fnithathe mu zabno dmahıt ido acla mu gayso Rusoyo. 

Lfuth u Kremlen, Putin bi socuruthayde hawile lqoyotho cam mathlone dı tuksoe magon, uknuşyo camu rişono du qlimo d’Korsk Alexander Xinıştayn, ubebzabno sımle socurutho li nuqazto trayonitho d’Korsk du haylo nukler dkıtyo bi mditho d’Kurtşatov. 

Putin bi socuruthayde mırle “u bceldbobo heş kımnase dımqadım lafa thume d’Rusya”, u makadle dıklozım dmitaqwın a’hıdriyat du sutoro udu benyono tahtoyo di fnitho bu zabno dkımdawmo i mwatyutho folhoyto cam Ukraina. 

I socurutho d’Putin athyo luhwoyo bu zabno dmawdacle u gayso d’Rusya dmadrele 159 tayisyotho Ukrainoye dlo pilot b’zabno d’12 şoce. 

I wazirutho du sutoro d’Rusya mathkarla d’127 tayisyotho Ukrainoye dlo pilot mfarqıci u madrın athmıl bayn di şuctho da hammış d’casriye huli hdo d’fothıdsafro. Wi sagiyutho da tayisyothani kıtwolın u nişo dhıçmi cala fenyotho d’Biryansk u Korsk. 

Bıthır mathe ste, i wazirutho du sutoro d’Rusya mawdacla dmadrela 32 tayisyotho hrene dlo pilot adyawma bayn di şuctho di hdo huli hammış dfothıdsafro.