2 taşrore dıfrisi grışe u zuhoro calu qento heş dkımşakıl Dacış

U Tukoso d’Emwotho Mhaydotho dkobe ağono mqabıl di marhıbonutho, grışle u zuhoro calu qento dheş kımşakli ağrobe marhıbone d’Dacış bı britho.

 Bebzabno mşalo Amerikoyo m’akadle da marhıbone d’Dacış, heş qawyene ba maşıryotho du garbay madınho d’Suriya u calathe klozım dmısnodi a hayle muttafik-QASAD bu duyoqo di mşaynutho da maşıryothani.

 Lfuth Tukoso d’Emwotho Mhaydotho dkobe ağono mqabıl di marhıbonutho, u tukoso d’Dacış heş kımdawım dımşakıl qento Emwothoyo. U makthıbo du tukosano grışle u zuhoro du Mawtbo di Mşaynutho d’Emwotho Mhaydotho u mawdacle, d’Dacış heş qento raboyo lu şlomo bı britho u mşarele naqla hreto dmazıd ahçomayde hem bu Iraq u hemste b’Suriya.

U mşalo du tukosano Vlademir Voronkov mırle; Walaw mahıt qamoyutho la fulhone mqabıl du pandemi di Corona, elo ğalabe ulsoyoyoste da hadome kulle d’Emwotho Mhayhdotho dmahti u yuqrathe lu ağono mqabıl di marhıbonutho. Voronkov bşıkıl rwiho, aydarbo kıhoçım fayış Dacış wa cuqobe dıksoyım dilonoyith cala thume. Hol 10 alfo marhıbone-i sagiyoyuthathe bu Iraq, kımnasın dmaqşın ahçomathe.

Bebzabno, mşalo Amerikoyo dlabıc dmathkır ışme me celotho di mawdconutho ğnızto dhuwle, mathkarle d’Dacış kıqomır u qrobo bıgawe da maşıryotho dkıtne bu garbay madınho d’Suriya. A marhıbonani mazıdlın a hçome wa qatle barbroye da galwoye. İ maşritho d’al Hol dilonoyith, kmifaşqo xıd nuqazto d’Dacış ume tamo kımtaksi marhıbone hathe u kınuqlınne lğer dukotho.

Cali sbutho da zuze d’Dacış mawdıc, da marhıbone kılaymi b’Turkiya ume tamo kmacbıri zuze l’Suriya ubi maşritho d’al Hol kmibarbızi a zuzani leşan dımdawmi dımtaybi a hçomathe. Uba dukotho d’Dacış laybe dsoyım mede, ğer ğrobe kriminal kımtaybi a hçome leşan dmaydi zuze. Bebzabno griş u zuhoro cali qroyto dsımwola Emwotho Mhaydotho, dmıgroşi a bnaymothoye d’57 athrawotho mi maşrithathe d’al Hol u mawdıc, dhano gado rabo’yo li tagorutho da qaçacçiye.

U mşalo Amerikoyo bu huthomo grışle u zuhoro, da Haylawotho d’Suriya Demoqratoyto kıtte sniqutho l’snodo Emwothoyo leşan u duyoqo di mşaynutho di maşrithathe uda galwoye dıkhoyın eba. QASAD l’hude, laybe hem dsoyım u duyoqo di maşrithathe u hemste dımharıb Dacış. Hol 200 marhıbone qadiri dmahzımi mi maşrithathe ba 2020.