A Calawiye d’Turkiya bi egartho demşayace l’Erdoğan sımme sturyo

Bıhdo egartho ftıhto dı kıthiwolın a mathlone d’Calawiye kıtılbi mu rişqutno Erdoğan dmiamni a zedqe da Calawiye xıd hiyoyutho dkıtyo bcayni şawyutho da came d’Turkiya. Bi egarthathe dkıtyo ftıhto u dıfriso bu tboco froso dıktıcno u ışmo du qoyumo dmeqım Şerafettin Halis kımo l’Erdoğan tray mu mamlo di ahutho dkımmıt elo a Calawiye kıbci şawyutho di barmothoyutho.

A Calawiyeste falqo mu camo dı Turkiya dı dişi a zedqathe xıd mazhab maşılmono, dı kulnaqqa kmiqadım ale xıd taye naqqatse aya sunna, hathe ktıryo macbıdonutho aclaye dıtocın a maşılmonwotho wa cadat dkıtlın hın xıd calawiye.

Bi egarthathe dımşadro l’Erdoğan kmitahke maktabzabnoyith a Calawiye mane mın gawno di tawditho kıtlın, u be bzabno kmahkın i casqutho dıkgurşi b’Turkiya dkul naqa kmihır appe xıd hrene, mawxaste sim aclaye qtolcame u taşniqe mşahılfe ha maniste u qatlo wu tewqido du hotel dmawqadwo cala nahire da Calawiye bu zabno mdinoyo ducdo.

Bi egarthathe kmawbxi Erdoğan u kımmile tray ma mele di ahutho dkımmate, a Calawiye bi qamayto kıbci dhowın a zedqathe b’şawyutho di barmothoyutho du athro u bıthır kibe mitawmare a melani di ahutho.

Bi egarthathe dıfriso bu tboco froso kmahwın u furşono da Calawiye ma maşılmone kımmi ahna a Calawiye latne sniqoye dmamtina i sodutho dı Mhammad aw dsaymina u sawmo du Ramazan, ahna kıtlan a sawme wa sohdwotheydan dkıtme lfuth Ali. I duktho di slutheydan latne a cwemıc masığde elo a botaycemne u maşılmonwottho hrene xıdani.

Bi egarthathe ftiho kımmi a Calawiye latne maşılmone xıdu mede d’Erdoğan kmıftakır mawxa klozım mitahwelın a zedqathe xıd hiyoyutho tawdithoyto mşahlafto.