A haylawotho d’QASAD msıke 18 marhıbone d’Dacış b’Deyr Ezzor

Me gabo hreno a Haylawotho d’Suriya Demoqratoyto, msıklın 18 marhıbone bu zabno da cuqobe dsımlın bu macırbo du qlimo d’Deyr Ezzor.

Bebzabno mawdıc, a hayle di mşaynutho di hiğmonutho d’Ninve bu garbyo du Cıraq, msıklın 4 marhıbone d’Dacış bi fnitho d’Zumar dkıtyo qarıwto la thume d’Suriya.

Bi maqırhonutho dhuwlın athmıl a Haylawotho d’Suriya Demoqratoyto mawdaclın, bıthır ma cuqobe casye dsimi yawme d’Cruto d’şafıcina, msıklın 18 marhıbone dıkmıthomi ba furqoce dsimi, ba qatle dhawın uğer’ste bi asirutho dkıtte cama hayle d’Turkiya ba dukotho dkbişila bu garbay madınho d’Suriya.

A hayle d’QASAD sımlın şişaltho d’cuqobe b’Abu Xaşab bu marcıbo d’Deyr Ezzor bıthır ma mawdconwotho ğnize dmatilın. İ hamlathe’ste simo bu taro du mrodo dkobın leşan u msoko da krılyotho da marhıbone uda sanodathe.

Camgabe da 18 marhıbone, mahıt’ste ido cal kmoyutho rabtho d’zayne u tahwiyotho dıkmthabti i sawco dhawilın a marhıbonani bu qatlo d’mdinoye uba furqoce dhawın calu amro da istixbarat d’Turkiya. Me gabo hreno bi hiğmonutho d’Ninve bu garbyo du Cıraq’ste sim cuqobe casye cala marhıbone d’Dacış.

U rabhaylawotho di hiğmonutho athmıl m’akadle, dımsıklın 4 marhıbone bi fnitho d’Zumar dkıtyo qarıwto la thume dcam Suriya. U cuqobano’ste sımwo bi methcadronutho da mawdconwotho da mdinoye ucalu amro du bethdino. Bu msokano, cali u mınyono da marhıbone dımsiki bi fnithathe l’12 thimoye.