A hayle Iraqoye msıklın 25 hadome d’Dacış bu daşto d’Ninve

Ba cuqobe dsımlın a hayle di mşaynutho du Iraq bi hiğmonutho d’Ninve, msıklın 25 marhıbone d’Dacış. İ wazirutho du sutoro du athro dımakadla u tebano mawdacla, da 25 thimoyani mıctaraflın bi mıştawtıfonuthathe l’Dacış.

 Me gabo hreno, u waziro di baroyutho du Iraq Fuad Hussein hawile mamlo bu telefon camu bar amnayde u Amerikoyo cala esore dbeyn da tre athrawotho.

 U gayso Iraqoyo hani zabno kımdawım a cuqobayde cala ğrobe marhıbone d’Dacış bı qlime frişe du athro. Ucdoste lfuth i maqırhonutho dıfrısla i wazirutho du sutoro du athro, ba cuqobe dsımlın athmıl a hayle di mşaynutho bi hiğmonutho d’Ninve, msıklın 25 thimoye bi asirutho dcama ğrobe marhıbone d’Dacış.

Mawdıc ba buqore dsimi cama thimoyaniste mawdelın, dkıtne hadome du tukoso marhıbono u dmıştawtaflın la hjome dsımle cala hayle di mşaynutho du Iraq. Meqım mu msoko da marhıbonani, qtılwo 2 marhıbone u mahrawo 20 dukotho d’Dacış ba cuqobe mşawtıfe dsımwolın a hayle Cıraqoye camu koalisyon Emwothoyo dkıtyo bi rişonutho d’Amerika.

A cuqobani du gayso Iraqoyo u du koalisyon Emwothoyo, simi calu qlimo d’Diyala. Me gabo hreno u waziro du sutoro du Iraq Fuad Hussein hawile athmıl mamlo bu telefon camu baramnayde d’Amerika Mike Pompeo u drışlın cala esorathe u cali niye dkıtla Woşington, dnuqlo i rişizgaduthayda mi arişkoyto Boğdod.

Hussein mawdacle u ğamo dıktucni bi sbuthathe di rişizgadutho wu tathir dıgtore cali aykanoyutho du momuno du Iraq. Hussein makadleste di şultonutho mıdla tedbire casye bu haqlo di mşaynutho, di siyase u da esore diplomatiqoye bnişo dmitaklın ahjome cali fnitho Yarıqto d’Boğdod wa fulhonani, gıdmamtın cam ruhaye şuşote rabe u towe bu zabno dactith.

Pompeo bu funoyo dhuwle l’Hussein mawdacle, du talabano du Iraq gıdoraşle me qariwo cami şultonutho d’Woşington. A hayle Şica dıkmısnodi mu İran, kmıthomi ba hjome dıkmisomi cali fnitho Yarıqto dkiba a mathlonwotho di şultonutho d’Boğdod u d’athrawotho hrene.