A İmarat Caraboye Mhayde maqrahe dıksındi u athro d’Fransa mqabıl Turkiya

A İmarat Caraboye Mhayde, hulın maqırhonutho dıksundi Fransa bi siyase dıkmaşyo mqabıl d’Turkiya bi sbutho d’Libya.

 Me gabo hreno u malolo du gayso athronoyo d’Libya Ahmed El Mesmari mırle; İ siyase d’Erdoğan b’Libya, teşmeşto la istixbarat dhın athrawothoyo.

 Bıthır mi mwatyutho dhawyo bayn Fransa u Turkiya bu tecjizo dsımla Turkiya cali sfitho d’Fransa kımdawmi athrawotho mşahılfe dmahwın u snodathe lı Fransa, athro hreno dmawdacle u snodeyde lı Fransa u athro da imarat caraboye mhaydeyo.

Bi maqırhonutho dhule u waziro di baroyutho da İmarat Anwar Gargash mırle ahna u athro da İmarat ksındina Fransa mqabıl da tahdide u da bcelıdboboyotho dkothe mu athro d’Turkiya.

U bebzabno kurhina b’qaşyutho u tecjizo dsımlın a sfinotho d’Turkiya cali sfitho Franşayto dkıtwa bu amro du Nato bu yamo. Me gabo hreno bi maqırhonutho dhule u malolo du gayso athronoyo d’Libya mırle Erdoğan kcowıd lhın hayle da istixbarat dı athrawotho hrene bi sbutho du athro d’Libya.

Mismari mırle: ufyoro da tayısyotho d’Turkiya l’Misuruta kımdawmi, u bebzabno a tayısyothani knuqli zayne l’Libya. U malolo komır a haylawotheydan hadirene dımdafci u athro d’Libya mawxa gımharbina hul dmawfqina Turkiya ma arcotheydan.