A mtagılyone di qastra d’Dhibin d’Sweda sxırlın u qentrun du gabo du Bacıth

Athmıl naqla hreto ba casrowat d’farsufe mtagılyone layimi bu wahdo du neshono d’Alkarama dıknuflo bi mdito d’Sweda bu taymno d’Suriya. Uba slogane dmazcaqlın makadlın a talabe ruşmoye dhani zıttır me 100 yawme dıknıfqi la zabuqone.

Bebzabno, a mtagılyone d’Sweda ba lohiyotho dıtcınlın tlıblın mu rişono du rejim d’Suriya Başşar Alasad dmıstacfe mi wolithayde. Yawme d’Huşabo’ste dşaficina, a hfite mtagılyone di qastra d’Dhibin dkıtyo masırto cam Sweda, sxırlın u qentrun du gabo du Bacıth b’şıkıl kulonoyo, bıthır mdımnasewole u rejim dı Darımsuq dfotıh u qentrunano udımtayıb ebe hfitutho.

Mabuco gawoyo mi mditho d’Sweda mırle “u grub du zawco mdinoyo di qastra d’Dhibin, masroyo camu xtuto du protesto mşayno u gdımdawamle. A’comure d’Dhibin ksındi a’comure d’Sweda ukım’aydilın ba talabaththe, wu ucdo’ste u zawco mdinoyo b’Dhibin sxıle u qentrun du Bacıth b’şıkıl kulonoyo, umşahlafle l’qentrun da hfitwotho”.

Hani zıttır me 100 yawme, a comure di fnitho d’Sweda kımdawmi a’tagılyotho du protesto, ukımtalbi dmitafıt la haye u fusqono d’Emwotho Mhaydotho da 2254, udmıstacfe Alasad mi wolithayde, udmitawfıqi a’msikoye ma hbuşye du rejim.