A pwelıs d’Danmark u d’Almanya bu cuqobo dsıme msıke 14 thimoye

A istixbarat d’Danmark, sımlın adyawma knuşyo lu tboco froso u huwlın mawdconutho cala cuqobe mşawtıfe dsımlın camu polis Almanoyo meqım kımo yawme.

 Ba cuqobani dsimiwo msıkwo 14 farsufe; beynothaye tlotho Suriye dıkmıthomiwo bi hedriye d’tuyobo dıhçomo marhıbono.

A istixbarat d’Danmark-PET, sımlın adyawma knuşyo lu tboco froso, bıthır mıd mu cuqobo dsımlın camu polis Almanoyo cal ğrob d’thimoye, dmalılwolın mluwe du syomo da foqucotho u dıkmtaybiwo ruhaye dsaymo hçomo marhıbono. Mawdıc dımqafe hol 10 kilowiye d’barut u otho dıktucnowa u remzo d’Dacış bu bayto da 3 ahunoye Suriye.

Ba cuqobani, msik  14 farsufe u 3 ahunoye me Suriya dıkmitawdıc dkıtwın a mşale du ğrobano. 13 man 14 thimoyani msiki b’mdito d’Danmark ba şoce du lalyo beyn yawme d’Şabtho u yawme d’Tre dşafıcina. U farsufo dan 14’ste msıkwo b’Hessen d’Almanya. Ucdo kito 7 thimoye msike b’Danmark ma thome du tuyobo d’hçomo-aw hçome marhıbone

A istixbarat mawdaclın, du nişo du ğrobano-dsaymi a hçomani ya b’Danmark yaste b’Almanya’we u calathe mabde buhone u buqore cama thimoye leşan dmidıc u plan dkıtwolın. İ aykanoyuthathe’ste kmifaşıqo ğalabe jıddi. İ wazirutho di kinutho d’Danmark mawdacla, di netiçe da cuqobani kımadilo dheş kito qento du hçomo marhıbono calu athrathe u calathe klozım dhowın ğalabe mahise.