07/07/2021

A qıryawotho du camaydan dkıtne bi hiğmonutho d’Nuhadra heş kmimodi nişo ma hayle Turkoye

A qıryawotho du camaydan dkıtne bi hiğmonutho d’Nuhadra bu garbyo du Iraq, midi naqla hreto nişo la hçome da hayle kaboşe d’Turkiya.

 Lfuth a tebe dfrisi me Nuhadra, mcal fothe da hçomani d’Turkiya, yaqidi an arcotho di qritho d’Hazanke wan arcotho d’ğer qıryawotho di fnithoste hzelın husrono.

A tayosyotho wa helikoptere da hayle kaboşe d’Turkiya, kımdawmi u hbosathe calu gerilla di PKK b’dukotho frişe di hiğmonutho d’Nuhadra. Mcal fothe da hçomani dıksaymo Turkiya bnişo dmatimo u gerilla, kımnasyoste dmatimo i ithutho du camaydan dıkhoye ba qıryawotho du garbyo du Iraq dkıtne qariwe la thumayda.

Athmıl naqla hreto, sımlın a hayle Turkoye hçome cala qıryawotho du camaydan dkıtne b’Chamanke. A soruhe dmafiri bi fnitho, huwlın husrono la bote ulan arcotho di zarocutho da comure wan arcotho di qritho d’Hazanke i celoyto’ste heş hol adyawma kımdawmi d’yuqdi.

U mgabyo d’Chamanke mawdacle’ste, dlıkqudri dmatfın i nuro wa falohe di tıffayo laybın dmotın li duktho du yuqdono mcal fothe du qento di mşaynuthathe. A hayle kaboşe d’Turkiya kıtlın’ste folhe di naşfe u nuqazyotho folhoye bi fnithathe leşan dmohın ba dukotho di PKK.

Mcal fothe da hçomani d’Turkiya- dıkmisomi cal qıryawotho dlatle u gerilla ithutho ebeye’ste, mınyono celoyo ma comure di fnitho jbiri dtorın mu mal u mulkathe, leşan dımqafın duktho mşayanto di ciyeşe. Bu falgo du yarho d’Hziron’ste, mhewola Turkiya b’qaşyutho b’5 qıryawotho d’Nuhadra u mawqadwola ban alfayo dönumat d’arcotho.