A qoyume du cameydan nafiqi mqabıl di rmoyto du qonuno di sictho da dayone du bethdino celoyo

A qoyume du camaydan bu parlamento du Iraq, nafiqi mqabıl di rmoyto du qonuno hatho di sictho da dayone du bethdino celoyo du Iraq.

A’hamşo qoyume du camaydan bu buyono mşawtfo dıfrıslın, mawdaclın du qonuno hatho du bethdino kmawbıl u Iraq laf athro Maşılmono, ukdoyış a’zedqe da came qalile du athro.

U parlamento du Iraq mtayabwole ba yawme dşaficina rmoyto hathto du qonuno du bethdino celoyo laşan dmisım quwolo acla ma 320 qoyume du parlamento. Bi ytawtathe dıdrişowa eba i rmoyto du qonuno hatho, a’hamşo qoyume du camaydan grişiwo mi ytawto, u mahwewolın u hfuxyaththe mqabıl du qonuno hatho du bethdino dıkmıtlıb ebe dmitazıd rişone tawdithoye Maşılmone li sictho da dayone du bethdino, udmitahwelın u zedqo du veto mqabıl da fusqone dıkmadlın u parlamento. İ sictho da dayone du bethdino kmişaklo m’9 hadome dkımmathli balhude a’Şica, a’Sunna wa Kurdoye du Iraq, wa came qalile du athro latlın duktho b’gawıd di sicthathe.

Calathe, ahamşo qoyume du camaydan bu parlamento d’Boğdod bu buyono mşawtfo dıfrıslın, mawdaclın dıkrıfdi u qonuno hatho du bethdino cal dkımşatıs athro tawdithoyo Maşılmono u kdoyış a’came tawdithoye hrene dkıtlın a’diloyothaththe. A qoyume du camaydan dmawdaclın du qonuno dıklozım dımmathıl a’came tawdithoye u umthoye mşahılfe du Iraq, makadlın ste du qonunano dothe dmitafıt la haye gıdhowele inaqlayo tathir mrimono rabo cali mlahmonutho du kenşo, u gıdjobır u sebyono di sagiyutho mqabıl di qalilutho.

Bebzabno, a’qoyume du camaydan makadlın dıkrıfdi dmisım quwolo calu qonuno hatho, dilonoyith da mluwayde lıkşowın lu nomuso esonoyo du Iraq bi sbutho du iqoro dıklozım dmitahwe la gawne umthoye u tawdithoye mşahılfe.

Bu huthomo du buyonaththe, ahamşo qoyume du camaydan tlıblın ma rişone folitiqoye u marduthoye umu kenşo emwothoyo dsonadlın bi sbuthathe, udmisım u garanti di mathlonutho du camaydan b’gawıd di sictho da dayone du bethdino celoyo du Iraq.