A qtolğense dsimi calan Armınoye, an Othuroye wa Yawnoye, mathkıri bi cito rabtho d’Mor Fetrus dkito bi mdito d’Melbourne d’Australia

MELBOURNE, Australia – İ hasyutho di cito Angelikoyto d’Melbourne d’Australia fsıqwola bu yarho d’Odor dşafıcina dsaymo adşato baytonutho lu duxrono şatonoyo da 110 eşne du qtolğenso mayiro dsımwola i mamlaxtho da Cuthmanoye calu camo Armınoyo, Yawnoyo u Suryoyo Othuroyo u mtayıb slutho mşawtafto cali ruho da dıbhe da 3 camani.

U duxronano sımwo yawme d’Huşabo 6 bu yarhano d’Nison bi cito d’Mor Fetrus b’Melbourne leşan dmitathkıri a dıbhe du qtolğenso da 3 camani u sımwo’ste xıd egartho qwitho di awyutho beyn da citotho mşahılfotho di mdito. Bu duxronano, sim mamle u m’akıd cali ulsoyutho di mawdyonutho ba hawbani bnişo dmifoto i truma u dhowe şlomo u mlahmonutho beyn da came frişe. Lu duxronano’ste hadır qoyume frişe di marcitho d’Victoria, rişone tawdithoye da 3 camani.

Mşalo mu tukoso Yawnoye mqadamle tahınyotho lu snodano di cito udu camo b’Victoria leşan i şultonutho di marcithathe’ste dmawdıyo bu qtolğensano xıda marcıyotho hrene d’Australia. U mşalo Yawnoyo mırle’ste; Wolitho’yo cal kulayna dmathkırina hani dcayşi meqım menayna ula çilat hrene dgıdothın bu dactith, leşan dhowe mawdyonutho kamılto u dmitahwe iqoro la dıbhe kulle.

U duxronano bebzabno snıdwo mu İnisyatif mşawtıfo di Kinutho dıkmişakıl ma mathlone da gabe u şutose da 3 camani dmafiti bu Sayfo. İ cito Angelikoyto wu İnisyativ da gabe da 3 camani, mabdewolın meqım zabno fulhone mşawtıfe bi sbuthathe du qtolğenso. Bıthır mi slutho’ste mathkıri a farsufe dhawilın dawro bu snodo da Mşihoye dım’athriwo mu qtolğenso di mamlaxtho Cuthmanoyto.