Bi ytawtato cam Benyamen Netanyahu, u rişono Amerikoyo Donald Trumo mırle; M’akdono, dkibi dmaxıfno i mwatyutho dkito beyn Tel Avi u Ankara

U rişono d’Amerika Trump, mıstaqbele athmıl u rişwazire d’İsroyel Netanyahu bu Qusro Heworo. Netanyahu, hawi u rişono qamoyo dıksoyım socurutho l’Trump bıthır mıd athi naqla hreto li rişonutho. Bu yawmoyo di ytawtathe beyn Trump u Netanyahu kıtwo i sbutho du gumruk dmahıtla Trump cal İsroyel, i sbutho da İsarloye dkıtne msike bide d’Hamas wu qento dıkmdawım u İran dımşakıl l’İsroyel. 

Bu şwolano du gumruk dmahıtla Amerika cal İsroyel, tlıble Netanyahu mu rişono Trump dmitaqım wu İsroyel’ste baroyo gıdmaqimo inaqla’yo u gumruk dkıtla calu mal d’Amerika-bnişo dhuwyo mathlo lğer athrawotho’ste dsaymi cayni mede. Trump dmawdacle da droşani ğalabe towo şafici, lo mawdacle en gıdmaqım u gumruk mcal İsroyel aw lo. Camathe kle cala cuqobe u terfiyo da İsarloye. 

U rişono Amerikoyo mawdacle’ste dkıtle tuxlono b’ruhe, dkibe dımsafe u şwolo di mwatyutho dhawyo beyn İsroyel u Turkiya bıgawe d’Turkiya u dkıtyo hadiro, dsoyım mescoyutho beynothaye. Trump mırle l’Netanyahu; Kull şwolo dhowelox cam Turkiya, ono kmıtyaqano dkibi şorenole. Ba zabne haroyani, zayıd u cnufyo beyn da 2 athrawotho dilonoyith bıthır mıd Hayat Tahrir al Şam madrewole u rejim catiqo.

Turkiya kısundo i şultonutho hathto d’Darımsuq elo İsroyel kımfaşqo i mdabronutho d’al Şarıc xıd qento u calathe kısaymo cuqobe qariwo la thume d’Suriya ubı duktho bıgawe d’Suriya. Turkiya’ste kımfaşqo İsroyel qento li ithuthayda b’Suriya. Bebzabno Bi socuruthathe l’Amerika, laqi’ste Netanyahu more d’şırak rabe wu mathlono d’Amerika bu Madınho Mescoyo Steve Witkoff uğer mşale du athro.