Farsufe di hiyoyuthaththe dlatyo idıcto, hçımlın cali cito d’Mor Jawırjyos da Rum Malkoye Ortodoksoye bi qastra d’Bludan bi mditho d’Alzabadani, Darımsuq

BULDAN, Suriya – Yawme d’Huşabo dşaficina ba şoce dfothıdsafro, farsufe dlatwın idice şmıtlın i kawtho di cito d’Mor Jawırjyos da Rum Malkoye Ortodoksoye bi qastra d’Buldan bi mditho d’Alzabadani dıknıflo qariwo m’Darımsuq. A’farsufani dcabiri lawğıl di cito bızlın benzin cali yarco u mahıtlın ste tarte foqucwotho dkıtwın mtaybe dmifarqıci lawğıl di cito, elo cal dlıqayıth u benzin a’tarte foqucwotho ste lımfarqıci ubalhude hew husrono momunoyo nacimo li cito lfuth i maqırhonutho dhule u kohnayda qaşişo Sımcan Ayyub li dafo d’Almaşhad. 

Qaşişo Ayyub bi maqırhonuthayde mırle “yawme d’Huşabo safrayto matino li cito u cabırno mu tarco du madhıbho laşan dımqarawno, elo nqıhli reho nuxroyo lawğıl di cito, u hşuli u rehano athi mi celtho da fulhone du hethotho dıksamlın u şamoşo di cito. Bıthır mıdıhzeli a’foqucwotho huli xabro lu şutoso di mşaynutho gawonoyto dımşadarle folhe dmaklelın u furqoco da tarte foqucwotho u ftıhlın buqore bhaq du gedşano. Ino kmıtyaqanno du sebyono d’Aloho we dlıqayıth u benzin udlımfarqıci a’foqucwotho. W’ucdo mşarelan dmarkıwina sayıryotho du duyoqo larwal di cito”. 

I cito da Rum Malkoye Ortodoksoye hul ucdo lıfrısla buyono ruşmoyo cali sbuthathe, elo u kenşo mdinoyo di mditho d’Alzabadani bu buyono dıfrısle mawdacle du gedşano nesyuno d’gunhoyo, ub’qaşyutho krıhle, u makadle du hçomo cal bayto ma bote d’Aloho hçomo cala comure di fnitho kulle yo. 

U buyono tlıble ste ma şutose di şultonutho dı Darımsuq dmabdın buqore şafye bhaq du hçomano, udsaymi u sutoro da dukotho di cabade.