A rişone di tawditho tlıbe mu camo dmoyıd u vaksin mqabıl di Corona

Bu zabno du virus di Corona kımdawım dmibarbız bu qlimo d’Kurdistan du Iraq, a rişone tawdithoye da Mşihoye, da Maşılmone uda Ezidoye d’Nuhadra, tlıbbe mu camo dmoyıd u vaksin mqabıl di Corona.

Me gabo hreno mawdıc, gawonoyith bu athro du Iraq kule, zayıd u mınyono da bnaynoşo dtafilın u dınqili ma haye mu virusano.

A rişone tawdithoye da Mşihoye, da Maşılmone uda Ezidoye bi hiğmonutho d’Nuhadra, sımlın athmıl qroyto la came di fnitho dımqaydi ruhaye u dmaydi u vaksin mqabıl di Corona. İ qroytathe simo, bıthır mıd i wazirutho du hulmono du qlimo d’Kurdistan grışle u zuhoro cala casqotho dıkloqın u dkull yawmo, kıtofe u virusano lhol 3 alfo comure uda bethkrihe malın kayiwe.

Calathe bi qroyto dsimo ma rişone tawdithoye d’Nuhadra tlıblın ma came dhowelın methcadronutho kamılto cami wazirutho du hulmono u dımaydi tedbire u dımhafdi ruhaye mqabıl du virusano. Yawme d’Tre d’şafıcina, matiwole u qlimano d’Kurdistan 78 alfo dozaçe d’Phizer u 52 alfo d’AstraZeneca u ftih nuqazyotho b’Arbil u b’Nuhadra leşan u mhoyo da mhate.

Bu zabno di şultonutho du qlimo mawdacla, bu zabno dan 24 şoce haroyani tafilın 3.172 bnaynoşo u virusano di Corona udhol 4.834 mvayaclın holucdo a hayathe bu qlimo, mawdıc dgımimıd tedbire casye mqabıl dkull farsufo dlıkmkase fothe u dıkdoyış a tedbire dmahti. Gawonoyith bu athro, m’atharle u virusano b’qaşyutho calu Iraq.

Ba şabe haroyani, hariwo zıttır i aykanoyutho da bnaymothoye mu virusano di Corona. Lfuth a hşowe haroye, kito adyawma hol 1.6 milyone dıbnaynoşo kayiwe, 18.938 mvayaclın a hayathe. Camatheste, holucdo 1.3 ba mo du camo mıdle a 2 dosaçe du vaksin d’4 şırak frişe; Phizer BionTech, Sputnik 5, AstraZeneca u Sinopharm.