A şutose d’MUB ba athrawotho d’Urifi mtayabe duxrone da sohde b’athrawotho mşahılfe d’Urifi

A şutose du gabo du mawtbo umthoyo d’Bethnahrin dkıtne ba athrawotho d’Urifi mhadarwolın duxrone da sohde b’athrawotho mşahılfe d’Urifi

Athmıl dkıtwe 10 bu yarho da caro dkıtyo u yawmo şatonoyo du duxrono da sohde d’MUB sim hfitwotho u mahke cali macne di sohdutho wu nofoqo du moro  dlasohde.

U yawmano du duxrono da sohde du mawtbo umthoyo d’Bethnahrin kul şato kmisim ebe hfitwotho laşan du duxrono da sohde mawxa adşato ste cam gabe da buyone dıfrisi wa hfitwotho dsimi bu athro da abohotho laşan u tethkar du yawmano sımwo duxrone b’Almanya b’Belçika b’Swizra u b’Hollanda  ste.

Bi mdito d’Guterslo d’Almanya sımwo u duxrono da sohde bıthır me falge d’Yawmo bi mtaybonutho dıtre Kohne Daniel Gök u Abdulmmesih Nergiz u mınyono d’camo dı hadiriwo bi bethmardutho dGuterslo.

Bu duxronano dıfris hayo b’Suroyo tv mqadamle u zmirotho laşan u iqoro celoyo dkıtlın a sohde.

Be bzabno mqadım mamlo b’ışme d’dmahkele calu iqoro rabo dkıtlın a sohde u sımle qrayto dminfiq moro ale cal dkıtne u dactid da zeqe du cameydan.

Dktho hreto dsımwo ebe u duxrono da Sohde d’MUB u salon di cito d’Mor Afrem dPolheim d’Almanya we.

Bu duxronano mqadım mamlo cal ışme du Mawtbo mu taraf dTurkan Ucar, bıthır u musiqoro osyo Abrohım Lahdo mqadamle mamlo cali macne da Sohde u be bzabno mqaım qole citonoye ma şamoşe dkıtwen hdiree.

Bu yawmano atre köhne Qaşo Lahdo u xuri Skandar maqımlın teşmmeşto cali ruho da sohde u mahkelın ste cali macne di sohdutho mınyo.

Bu yawmano dkıwo hadire hadome da gabo Almanoye d’CDU  u  mathlone d’DETA  mqadamwo mimro me Sarkis Teodoros.

Bu athro d’Hollande bu beth suroyo dkıtyo b’Hengelo mhadarwo u duxrono da Sohde  dıfrıswo hayo b’Suroyotv  bu duxronano mqadım mamle mşahılfe cali macne di sohdutho Muşe Mutlu be şaboBahdo qrewole u buyono d’MUB u Yusuf Buyukahrman  dkıtyo u kordinator di fnithathe sımwole mamlo cali sohdutho u mahkele qay klozım nıfqina more la sohde dmahatlın u admathe bu darbo di hirutho du cameydan

Me Gabo hreno Jusef Gawriye u Sabri Sacdo qrewlın kulha mimre cali macne du yawmano.

Bu athro d’Beliçika bi  bethmardutho dkıtyo b’Nruksel i claymutho d’ESU mhadarwola u duxrono da sohde d’MUB.

Bu duxronano u rişono zawgoyo d’ESU Fehmi vergili mqadamle mamlo dı mahkel cala sohde dhawın i şroğoğ bahırto bqamuthe du ağuno di hirutho du cameydan, u bıthır İsa Hnna mqadamle mimre wu zamoro Skandar İde maşmacle zmaryotho la hadire.

Bu athro d’Swisra ste mhadarwo u yawmo du duxrono da sohde d’MUB.

Bu duxronano i rişonitho zawgoyto du mawtbo sucronoyo di Gozarto d’Bethnahrin Nazira Gawriye mahkele cala sohde dhulın a hayathe mawx ste ucdo isbutho du cameydan kmidroşo ba platforme dıbritho wa cam este kımyaqri u cameydan wi sbutheydan.

Be bzabno u mlahmono  d’Swizra Samir Öxmen ste mqadamle mamlo cali macne du yawmano.

Ba duxronani kule fris u masıdro dkıtyo cala Sohde du mawtbo umthoyo d’Bethnahrin  u frisi ste a hfitwothani bu froshızwo d’Suroyo tv hayo.