A Turkoye kcubri l’Urifi b’Passaporte mzawre

Bu zabno haroyano, u tboco froso demoqratoyo d‘Turkiya frısle tebe, dcala hadome du gabo d’AKP dıkmşadri farsufe larwal du athro b’pasaporte mzawre.

Ucdoste u tboco froso wi wazirutho gawoyto d’Almanya mzharlın, da istixbarat du athro kımcaqbi a pasaportani dıkmitawmarlın GRİ:

A pasaportani dıkmitahwın la farsufe dkıtne falohe b’şutoso di şultonutho bıgawe d’Turkiya yaste larwal mu athro, kibın dsaymi socurutho lhın athrawotho Urifoye dılo fsoso visa. Bu zabno haroyano magle, d‘zıttır me 40 farsufe nafiqi l’Almanya ba pasportani wa farsufani mawdıc dkıtne qariwe lu ahıl dhın ma hadome d’AKP du rişqutno Erdoğan.

Lfuth u tbocofroso dhani zabno kforıs tebe cali hilathe da passaporte komır; Bu zyudo da farsufani dazzın l’Almanya me hedor Cıntabne. Ucdoste i wazirutho gawoyto d’Almanya huwla amro la istixbarat du athro, dımcaqbi a farsufe dkıtlın a passaportani dkıtne ışmaye Grey awkith qatmonoye wu gawnathe’ste qatmonoyeyo.

I wazirutho bu fusqoneyda dla ferce da istixbarat d’Almanya mawdacla, da farsufe dkıtlın a passaportani klozım dmitahıt ido aclaye u dmimodi menaye. Bu dumyano a passaportat d’Turkiya, kıcubri bu taro du thomo dkibe howe hile ebeye, mawxa klozım dmisim zuhoro cala passaportat du athro.