Adyawma simo i masırhonutho ruşmoyto d’Papa Leo da XIV bi mıştawtıfonutho d’mınyono celoyo d’rişone, malke u amire

VATIKAN – Hol 250 alfo bnaynoşo layimi adyawma bu wahdo d’Mor Fetrus u Fawlus bu Vatikan leşan dhozın u Papa hathto dmakrıx beyn du camo bi radoytayde i dilonoyto. Bu zawhano u camo dlayim tcınle b’idothe i otho d’Peru u d’Amerika cal du Papa dkıtyo Amerikoyo elo dmafıtle eşne yarixe b’Peru.

Bıthır mu kroxo beyn du camo, cabır u Papa wa kardinale li cito d’Mor Fetrus leşan dmıstaqbıli a duşne-xıd mathlo i cisaqtho da sayyode da nune dkıtyo remzo du qadişo Mor Fetrus-dhawiwo’ste u Papa qamoyo. Bu mamlayde’ste u Papa tlıble ma rişone dbritho dnufqi moro lu camo faqiro u dımaklın u tehriwo du kyono u dımçahdi leşan u şlomo b’britho.

U zawho dımdawamle bu Qurobo Alohoyo, masrıh u Papa Mor Leo da XIV ubu dumyano, kımşare i wolithayde xıd rişono du cılmo Qatholiqoyo. Bu yawmano’ste, hadır mınyono celoyo d’rişone u mşale d’athrawotho frişe; beynothaye u rişqutno d’Ukraina, u rişwazire d’Kanada, u rişqutno d’Lebnon, u tahlufo du rişono d’Amerika.

Camani’ste hadır malke malıkyotho u amire d’athrawotho frişe wu fatıryarxe d’citotho mşahılfotho dbritho. İ qadişutho du Papa Mor Leo XIV, mnaqewo 8 bu yarhano bıthır mu şunoyo du mnohnafşo Papa Mor Fransis bi harayto du yarho d’Nison dşafıcina. Hathe inaqla qamaytoyo bu makthabzabno du Vatikan’yo dıkminaqe Papa Amerikoyo.