Ahaylawotho Iraqoye mşarelın ba cuqobe dmeydi a zayne lo qonunoye

A haylawotho di mşaynutho du Iraq, mabdelın cuqobo casyo leşan dmaydi a zayne lo qonunoye dkito bi mditho d’Basra. Mawdıc du cuqobanoste gdımdawım 5 yawme leşan dmitahıt ido cala zayne lo qonunoye dkito bide da ğrobe msalhe di hiğmonutho.

 Bebzabno mawdıc, du qentrun da pwelıs di mditho di Suleymaniye bu garbyo du Iraq msıklın 10 farsufe, dıkmıthomi bi morutho d’zayne lo qonunoye u bu cnufyo dmıstacmelın mqabıl dğer.

Rabhaylawotho Iraqoyo b’Basra mawdacle, dmabdelın adyawma hamle rwıhto leşan dmahti ido cala zayne lo qonunoye dkito bi hiğmonutho d’Basra. İ hamlathe dgımdawmo 5 yawme, u nişayda dmimodi a zayne kulle dkıtne bide da mdinoye u da ğrobe msalheyo.

A zaynaniste kmitıstacmıli ba hjome u bu qatlo da mtagliyone u da farsufe hfite b’Basra. İ hamlathe mabdıyo, bıthır mıd u rişwazire Mustafa al Kazimi huwole şudoyo dımhafıd cala farsufe hfite u dımhaşıw a hayobe. Elo u rabhaylawotho Iraqoyo makadleste, dkull bayto kıtle zedqo lıha zayno xayifo.

Bu zabno da cuqobaniste lıgmitahıt mnoco du nfoqo qum du camo, elo gıdmitahıt qonune leşan a hayle di mşaynutho dı qudri dsaymi a cuqobathe. Me gabo hreno u qentrun da powelıs di mditho di Suleymaniye athmıl mawdacle, dımsıklın 10 farsufe dıhkimi bu hawbo du hboso u du gzomo da bnaynoşo u bi morutho d’zayne lo qonunoye.

A farsufani, kıtwolın zayne yaqure u xayife uğer lojistik folhoyo. Camgabe da zayne, mahıtleste u polis ido cal 4 radoyotho, d’2 menaye dlatwın qonunoye u mdacewo, dkıtne da hayle di peşmerge. Bu zabno du cuqobanoste, nafıqwo taxtuşe beyn da hayobe u da pwelıs du qlimo d’Kurdistan.