Serbia u Kosovo gıdnuqli a rişayizgadwothathe me Tel Aviv li mditho d’Urışlem

Bi maqırhonutho dhuwle u rişwazire d’İsroyel Benyamen Netanyahu mawdacle, dan athrawotho d’Serbia u d’Kosovo gıdnuqli a rişayizgadwothathe me Tel Aviv li mditho d’Urışlem.

 Camgabıdathe da şuşotani dkowın beyn İsroyel u dhın man athrawotho Caraboye, a Bahrainste mawdacla dıgdobo ucdo aftho la tayosyotho mdinoye d’İsroyel u da İmarat Caraboye Mhayde, dfayiri cala thumayda a oyaroye.

Lfuth i maqırhonutho dhuwle u rişwazire d’İsroyel Benyamen Netanyahu, Serbia u Kosovo mayadlın qyomo bu Qusro Heworo, leşan dımcadli a esorathe cami şultonutho d’Tel Aviv. Netanyahu mırle; Serbia gıdnuqlo i rişizgaduthayda me Tel Aviv li mditho d’Urışlem u bu şıkılano, gıdhuwyo u athro Urifoyo qamoyo dgımhalıx ba dawsat dımhalaqla Amerika.

Netanyahu mawdacleste d’Serbia gıdnuqlo i rişizgaduthayda l’Urışlem bu yarho d’Tamuz da 2021. Elo u fusqonano d’Serbia, simste sturyo me mşalo da Fleştoye. Bebzabno Netanyahu mawdacle, d’Kosovo gıdfutho mathlonutho b’İsroyel u bu şıkılano, gıdhowe Kosovo u athro Maşılmono qamoyo dfotıh rişizgadutho d’Urışlem.

I sagiyoyutho da mathlonwotho nuxroye dkıtne b’İsroyel bi mditho d’Tel Avivne leşan dfayşi neutral bi sbutho du qetro dkito cal Urışlem hol du statu di mditathe dmiakıd bu qyomo du şlomo dıkmıntır dhowe beyn İsroyel wa Fleştoye. Elo ba 2017, mıctarafwole u rişono Amerikoyo Donald Trump b’Urışlem xıd arişkoyto d’İsroyel u nqiwole i rişizgaduthathe me Tel Aviv l’Urışlem.

Me gabo hreno mawdıc, d’Bahrain gıdobo aftho la tayosyotho d’İsroyel uda İmarat Caraboye Mhayde, dmıstacmıli a thumayda di hawa. U fusqonano mid, bıthır mıd i Scudiye huwola aftho la tayosyotho d’İsroyel dfayri cala thumayda. Bahrain mıdla u fusqonano, bıthır mu talab dathila ma İmarat Caraboye Mhayde.