07/08/2020

Amerika mşadarla konvoy folhoyo li mditho di Hasake

U gayso Amerikoyo mşadarle konvoy folhoyo rabo li nuqaztayde dkıtyo hedor di mditho di Hasake bu garbay madınho d’Suriya.

 U konvoyano dıkmişakalwo me hedor d’50 kamyone, şafıc lu qlimo di Gozarto d’Bethnahrin mi nuqazto d’Alwalid du thumo beyn du Iraq u Suriya.

U ajans Rusoyo d’Sputnik bu tebo dıfrısle, mawdacle d’konvoy folhoyo dıkmişakıl me 47 kamyone rabe u acmaye 7 radoyotho folhe dıktıcni i otho d’Amerika, athmıl falge d’yawmo matın li nuqazto folhoyto du gayso Amerikoyo bi mditho di Hasake, u dıknuflo calu darbo Emwothoyo d’M4.

U konvoy folhoyo d’Amerika mati li nuqazto d’Live Stoon athoyo mi xasra di mditho di Qamışli, bu zabno dkıtyo u darbo Emwothoyo d’M4 xalyo mu trafik, bi netije da tedbire du mnoco du nfoqo dmahıtla i Mdabronutho yothoyto di Gozarto mqabıl du virus di Corona.

Lfuth u ajans d’Sputnik, u konvoy folhoyo d’Amerika kmıhşu falqo mu konvoy rabo du koalisyon Emwothoyo dcabırwo li Qamışli yawme d’arbıco dşaficina. U konvoyano kmişakalwo me casrowat d’kamyone rabe matcıne radoyotho folhoye u mdinoye u mcadrınwotho lojestik.

U konvoyanoste şafıcwo mi nuqazto du thumo d’Alwalid, falqo mene mşadarwo la nuqazyotho folhoye du gayso Amerikoyo dkıtne hedor i Hasake, wu falqo hreno mşadır athmıl la fenyotho du madınho d’Deyr Ezzor.

Check Also

A gabe u tukose komonist u semoloye mawdelın bu Sayfo da 1915

A gabe  u tukose  komonist baynothemwothoye frıslın maqırhonutho dıkmawdin bu sayfo du cam…