Amerika u Polonya mdelın qyomo laşan u nqolo da folhe

Amerika mdela qyomo cam Polonia, leşan dnuqlo a folhe dkıtla b’Almanya l’Polonia.

 Bu qyomo dımdele u waziro di baroyutho d’Amerika Mike Pompeo camu waziro du sutoro d’Polonia bu qusro di rişqutnutho b’Warşaw, gıdmınqoli a  12 alfo folhe dkıtla Amerika b’Almanya lu athro d’Polonia.

U waziro di baroyutho d’Amerika Mike Pompeo, laqi u waziro du sutoro d’Polonia Mariusz Blaszczak bi rişqutnutho dkıtyo bi erişkoyto Warşaw. Bıthır ma droşe dhawın, mdelen atre wazire qyomo leşan u nqolo da folhe Amerikoye dkıtne b’Almanya lu athro d’Polonia dkıtyo bu madınho d’Urifi.

Bgawe du qyomanoste, camgabe dgımınqıl alfo folhe Amerikoye hrene l’Polonia, şafic u athro xıd qentrun rişoyo du gayso Amerikoyo, kıtlaste mkono dmıstacmılo a foqudwotho d’Polonia u dımhathıtho a qentrune wa hayle folhoye d’Polonia. Heş me meqım kıtla Amerika 4.500 folhe bu athro.

U rişqutno d’Polonia Andrzej Duda bu zawho dsim bıthır mu mdoyo du qyomano mırle; uqyomano gıdhowe tewrixo du garanti mqabıl da gzome dkito cala folhaydan. A hayle da tıre athrawotho, kibın ucdo ido bido dobın ağuno camıhdode. Bu qyomano, kmitaqweste u sutoro wi mşaynutho dğer athrawotho d’Urifi.

Amerika kıtla niye dgurşo a 12 alfo folhe dkıtne bı dukotho frişe d’Almanya. I maqırhonutho du groşo da folhani me Almanyaste mawdıcowa me Pentagon bu yarho dı şafıcina u makadwo, dgımitanqıs u mınyono ma 36 alfo folhe l’24 alfo. Lfuth u rişono Amerikoyo, Almanya lıkmahto masraf makfıyono calu sutoro u lkımcadro u NATO makfıyono bi sbuthathe.