An arkeolog, mqafelın a garme d’athto mi mdinoyutho d’Karal, dıkducro l’meqım hamşalfo eşne bu athro d’Peru b’Amerika i Latinoyto

PERU – Lfuth i mawdconutho dhuwlın an arkeolog, mqafelın meqım 2 yawme garme catiqe dıkducri l’meqım 5 alfo eşne, b’Aspero b’Peru dkıtwa meqım duktho dımhalqo’wa i karxutho u zawlayda eba. Ba 90’yat, hawyo Aspero duktho du arkeoloji u kıfayşo 180 kilometre mu garbyo di arişkoyto d’Peru Lima.

U mede dıkgorış u zuhoro cali mumiye’athe da garmani dkıtne d’athto, d’ğalabe towo mhafde’ne u kmitıftakır dkıtne mu zabno di mdinoyutho d’Caral. Mawdıc, cal da garmani mahıt tacbo rabo aclaye leşan dmihafdi, hathe kımadilo dkıtwola i athtathe dawro rabo bu kenşo. An arkeolog kmıtyaqni di athtathe inaqla dınqilo ma haye, cımra beyn 20-35 eşne’wa u metro u falge celoyto’wa.

U arkeolog David Palomino mawdacle l’AFP; Lfuth u mede dıkmahwe, a neşe kıtwolın meqım status celoyo. Mıstacmıl darmone u mone frişe bu cufoyo di athtathe. Cal dheş kito ba da garmayda galdo, tarfone u sacro. Gawonoyith a hakome gawre’wın aw kıtwolın dawro rabtır bu kenşo. Elo bu mede dımqafelan kımahwe da neşe’wın dkıtwolın u dawro rabo bi mdinoyutho d’Caral.

İ mdinoyuthathe d’Caral kmifaşqo i catıqto d’Amerika i Latinoyto u kıdocır u makthabzabnayda me 3 alfo uhol 1800 meqım me Mşiho, lu zabno di mdinoyutho d’Bethnahrin, d’Mısır udu Sin. İ dukthathe d’Aspero mahtowa ba 2009 bi lohitho di yortutho d’Emwotho Mhaydotho.