19/05/2021

Armenia ftıhla dacwa bu bethdino da zedqe noşoye calu athro d’Turkiya

Armenia ftıhla dacwa bu bethdino da zedqe noşoye d’Urifi mqabıl di mudaxala dhawila Turkiya bu qrobo d’Nagorno Qarabax.

U bethdino d’Urifi athmıl mawdacle, dmatile athmıl i şkıwathe mi şultonutho d’Yerevan. Me gabo hreno Rusya mawdacla dkıtyo hadırto, dsaymo mescoyutho beyn Armenia u Azerbaijan bi sbutho da thume da tre athrawotho.

Armenia mawdacla, dftıhla dacwa bu bethdino da zedqe noşoye d’Urifi calu snodo dhawila i şultonutho d’Turkiya la hayle d’Azerbaijan bu zabno du qrobo dhawiwo beyn Armenia u Azerbaijan bi harayto di şato dşafıcina b’Nagorno Qarabax.

U bethdino da zedqe noşoye d’Urifi’ste athmıl m’akadle dmatile i dacwathe me Armenia elo u bethdino tlıble’ste ma gabe kulle du qrobano; acmaye Turkiya’ste dmaklın u cnufyo, dımdafci a zedqe noşoye da mdinoye u dımyaqri’ste a qyome Emwothoye.

Bıthır mi şalyuthzayno dsimowa 9 bu yarho d’Teşrin u haroyo da 2020 leşan dmitaklın a taxtuşe b’Qarabax. Rusya sımwola bu zabnawo mescoyutho beyn Armenia u Azerbaijan ubi netiçe mafıtwo dukotho frişe du qlimo d’Qaraba lu duyoqo d’Azerbaijan.

Wu ucdoste huwle u waziro di baroyutho d’Rusya Sergej Lavrov maqırhonutho u mawdacle, dkıtne hadire dsaymi naqla hreto mescoyutho beyn Armenia u Azerbaijan bnişo dmisafe u qetro da thume da 2 athrawotho u dmitarkıw maşıqlo di nihutho beynothaye.

Check Also

İ sictho du hulmono di mdabronutho yothoyto hula mawduconutho rwıhto calu kewo di Corona

Tmınyo farsufe mayithi mi celtho du virus d’Corona, u zıd me 500 hrene tafilın u kewo ba f…