Armenia mawdacla dıtlotho ma folhayda qtili ma hayle d’Azerbaijan

Bi maqırhonutho dıfriso me Armenia mawdıc, dıtlotho ma folhayda qtili ma hayle d’Azerbaijan, bıthır ma taxtuşe dnafıq beynothaye cala thume dbeyn da tre athrawotho.

Yerevan makadlaste, da taxtuşani hawın a qaşye dkulle mu zabno du qrobo dhawiwo beyn Armenia u Azerbaijan calu qlimo d’Nagorno Qarabax bi harayto di şato d’şafıcina.

Lfuth i maqırhonutho dhuwla i wazirutho du sutoro d’Armenia, nafıq athmıl taxtuşe beyn da folhe d’Armenia u Azerbaijan cal ha ma thume da 2 athrawotho. Ba taxtuşani dqtil 3 folhe Armınoye u dımçarıh 2 hrene, mfaşqi a qaşye dkulle mu zabno du kriz dnafıqwo bi harayto di şato dşafıcina calu qlimo d’Nagorno Qarabax.

A taxtuşani dhawın bi qritho d’Sotk dkıtyo calu thumo dcam Azerbaijan. İ wazirutho di baroyutho d’Armenia’ste mawdacla, d’Azerbaijan b’idactho kımaqşıyo i aykanoyutho leşan u dyoşo di morutho da dukotho d’Armenia. Elo camathe’ste Azerbaijan thımla Armenia ba provokasyone.

Baku mawdacla, ba taxtuşani mçarıh 2 ma folhayda u mırla; Armenia’yo dıktucno i mşalutho du şuşoto di mwatyuthathe cala thume dbeyn da 2 athrawotho. U qetrano da thume beyn Armenia u Azerbaijan mşarewole bu yarho d’İyor-bıthır mıd Azerbaijan macbarwola folhe la thume d’Armenia.

Ba taxtuşe dımdawamwolın 6 şabe beyn da hayle da 2 athrawotho bu qlimo d’Qarabax bi harayto di şato da 2020, qtılwo 6.500 bnaynoşo ubu yarho d’Teşrin u haroyo’ste sımwola Rusya mescoyutho leşan dmitarkıw şalyuthzayno beyn da 2 athrawotho.