Athmıl bi şoctho da 20.30 d’Urifi uhola 21.30, matfın a bahre d’bınyone rişoye remze d’athrawotho frişe, xıd remzo du nfoqo du moro lu mahduro di britho

I kampanya d’Earth Hour-awkith Şoctho leşan britho, mşarewola bi mdito d’Sidney d’Australia bi şato da 2007 bu inisytativ du Fond du Kyono d’Britho. Mu zabnawo uholucdo, kmisomo i kampanyathe kull şato bı athrawotho frişe dbritho. Athmıl’ste hın ma remzani dmatfelın u bahrathe şoctho kamılto.

Beyn dani kito-u burgo d’Eifel b’Fransa, u bınyono di opera d’Australia, Empire State Building b’Amerika, Coloseum d’İtalya, i cito d’Mor Fetrus u Fawlus du Vatikan, bınyone b’Pakistan, Malaysia, Taiwan, Bulğaria uğer. Bu şıkılano kull şato bu lalyo d’24 Odor, kmitatfın a bahre bi şoctho-awkith ma 20.30 uhola 21.30, leşan u dmınfıq moro lu mahduro di brithaydan.

Wu nişo du tetfiyo du bahro zabno d’şocthoste, kampanya remzonoyto’yo u latyo leşan dmitıstafıd mu enerji u kmıştawtafla hol 180 athrawotho. Bcayni zabno u renyo dkito bıthre di kampanyathe, dmişadır signal folitiqoyo la hayle Emwothoye bi sbutho du şwolo du muzoğo dkito adyawma bi brithaydan, bnişo dmimıd tedbire leşan dmicadıl’yo.

Elo bu zabno di şocthathe’ste, knoqıs u isticmal du kahrobo ğalabe ba macımle frişe du energi. Lfuth u Fond du Kyono d’britho-WWF, i şocthathe-d’Earth Hour, u manifestasyon rabo dkito b’britho’yo u kmıştawtafla ba milyone dıbnaynoşo, bınyone remzonoye, şırak u mdinotho b’athrawotho frişe dbritho.