Barham Salıh mzaharle Turkiya cala hjome dıkseymo calu garbyo du Iraq

U rişqutno du Iraq Barham Salıh, sımle qroyto l’Turkiya dmaklıyo a cuqobe folhoye dıksaymo calu garbyo du athro wu husrono dkobo la mdinoye du qlimo.

 Bebzabno mawdıcste, dmaxlın a qıryawotho d’Zaxo mcal fothe da cuqobani dıksaymo Turkiya cali fnitho, bnişo dmadrıyo u haylo du gerilla di PKK.

U rişqutno Iraqoyo Barham Salıh, bı qaşyutho krıhle ahjome dıksaymo Turkiya calu garbyo du Iraq wu husrono dkobo la mdinoye, bnişo dmıhyo dharbo lu gerilla di PKK. Salıh mawdacle di şultonutho Turkoyto, klozım dmaklıyo a cuqobani u mırle; İ rişqutnutho du Iraq, kıtulbo me Ankara dmaklıyo ahjome dıksaymi cali morutho du athro.

Ankara mabdewola bu şuroyo du yarhano a cuqobayda cali PKK bu garbyo du Iraq u mdacewola, da cuqobe kmisomi, cal dzayidi ahjome di PKK cala qentrune folhoye d’Turkiya dkıtne cala thume beyn da 2 athrawotho şbobe. Athmıl casriyeste, sımle u gayso Turkoyo cuqobe hathe calu gerilla ubi netije nafıq taxtuşe beynothaye ba turone d’Xamter bu madınho d’Zaxo.

Mcal fothe da hjomani uda taxtuşe dhawın beyn Turkiya wi PKK, mınyono celoyo ma qıryawotho d’Zaxo maxlın ma comurathe u mahıt mnoco d’noşo dcobarlın. M’akıd dhol 361 qıryawotho d’Nuhadra maxlın ma comurathe. A comure da qıryawothani mawdaclın u haşathe u mırlın; A hjomani mahrawlın a mulkonaydan kulle. Ba cuqobe dsimi holucdoste, qtil 5 mdinoye.

Cali aykanoyuthathe Barham Salıh mırle; A camlani, dyoşo da prensibe da esore beyn dan athrawotho şbobe uda qonune uda maqırhonwotho Emwothoyene. Kito sniqutho dmışrın a qetre di mşaynutho beyn du Iraq u Turkiya bu darbo di methcadronutho udu kordinasyon beyn da mşale da 2 athrawotho.