Bassam İshaq hule maqırhonutho lu tboco froso

U rişono di sictho di rişonutho du mawtbo d’Suriya demoqratoyto d’MSD Bassam Sacid İshaq, mawdacle dlıkmıtyaqın da haylawotho Amerikoye dmıgroşi mu garbay madınho d’Suriya, hul dlımımte lışroyo kamilo bi sbutho du kriz folitiqoyo d’Suriya.

Camgabıdathe, İshaq dmawdacle du camaydan dqayıthle yuthrone bu taro di mdabronutho yothoyto, mathkarleste da Suryoye-Othuroye hıneste xıda came hrene kmiathri ma hjome dıksaymolın Turkiya wa çatawiyayda calu garbay madınho d’Suriya.

U rişono di sictho di rişonutho du mawtbo d’Suriya demoqratoyto d’MSD Bassam Sacid İshaq, bi maqırhonutho dhule li dafo d’Rodaw, mawdacle du gayso kaboşo dı Turkiya wa grube çatawiye bnayqyomayde sımlın bi şato da 2020 hçome cala fenyotho dkımşarın m’Tel Abyad huli mditho d’Rişcayno, wu medano trele tathir mrimono calu garbay madınho d’Suriya ucala fenyotho du madınho dı Froth. Elo lfuth İshaq u camo dıkhoye bu telolo di mdabronutho yothoyto qadır dnofıq mqabıl da casqıwotho mşahılfe dcayışlın u qlimo du garbiyo udu madınho d’Suriya dilonoyith u kriz d’Corona, i aykanoyutho haruto du momuno wu shofo di lira d’Suriya. Xıd mathlo İshaq mawdacle di mdabronutho yothoyto mawzadla an’ağre da fqide dıkfılhi ba şutose dkıtne maser eba, bnişo dmınfıq mqabıl di aykanoyutho qşitho di ciyeşe yawmonoyto.

Ishaq mahkele ste calu tathir di netiçe da guboye d’Amerika calu kriz d’Suriya u mırle “a’guboyani kmıştacın dawro rişoyo bu qrobo d’Suriya, mawxa ahna knıtrina u maşıqlo hatho laşan dqıdrina dımdawmina bu tufso mgawno di mdabronutho yothoyto dkımşarrıro i ciyeşe mşawtafo bayn da camayda”. Bebzabno, İshaq mawdacle dlıkmıtyaqın da haylawotho Amerikoye dmıgroşi mu garbay madınho d’Suriya bu maşıqlano ducdo hul dlımımte l’şroyo folitiqoyo haroyo dıkmiayıd ma gabe u came mşahılfe d’Suriya. Ishaq maqrahle ste dkito yuthrone mşawtfe bayn da haylawotho d’Suriya demoqratoyto d’QASAD wa haylawotho du koalisyon emwothoyo dkımrayşınole Amerika, wa yuthronani lıgıdtaymi camu qşoco du tukoso marıhbono dı Dacış. Bebzabno İshaq grışle u zuhoro calu rişono hatho d’Amerika Jeo Biden bu zabno di kampanyayde da guboye dmırwole dlatle mabcı dgorış a’haylawotho Amerikoye m’Suriya.

Camgabıdathe, İshaq dkıtyo u rişono du mawtbo Suryoyo athronoyo d’Suriya, maglele calu mabco dkıtle dmıştacyo Amerika dawro mescoyo laşan dmışroyi a’qetre dkıtla i mdabronutho yothoyto wa haylawotho d’QASAD cama n’athrawotho şbobe, uba melani mdawamle “kıtli sabro du mawtbo d’Suriya demoqratoyto d’MSD dmıştawtıf bu şroyo folitiqoyo d’Suriya, dhowe u qolaydan şmico, udlımdawım u dyoşaydan xdu mede dhawi ba ytawyotho di sictho mtaybonitho du nomuso esonoyo d’Suriya b’Çenev. İ methcadronutho bayn du koalisyon u QASAD mede dıkmıtlıbyo. Ida dkıbcina şroyo folitiqoyo klozım dmitarku şalyutho folhoyto, u mawxa ahna sniqoeyena lu koalisyon ul’QASAD xıd bnayqyome dıhdode”.

Cali sbutho da casqıwotho dıkloqelın u camo Suryoyo Othuroyo dıkhoye bu garbay madınho d’Suriya, İsahq mırle “i casqutho du camaydan xdi casqutho dcayşila a’came hrene yo. Kito zuctho mu kboşo di fnitho ma çatawiye du gayso dı Turkiya, cal du camo Suryoyo Othuroyo kıtle nesyuno mariro cam Turkiya bu zabno du qtolğenso du Sayfo da na’1915”.