Baynothıd di PKK u d’Alhaşd Alşacbi gıdhowe sdirutho

U gabo da Falohe d’Kurdistan di PKK mawdacle dgıdhowe sdirutho bayne ubayn da haylawotho d’Alhaşd Alşacbi, bnişo dmınfıq mqabıl dkul hçomo bceldboboyo dkibe dmisım cali fnitho d’Şigur bu garbiyo du Iraq.

Lfuth hın folitiqoye, i awyutho dkito bayn di PKK uda grube mzayne bnayqyome du İran mqabıl Turkiya, kıgurşo u zuhoro.

U mşalo da nesore du gabo di PKK bu Iraq Kawa Şexmus bi maqırhonutho dhule li dafo da tebe d’Almacluma, mawdacle du gabayde gıdhowele sdirutho cama grube mzayne d’Alhaşd Alşacbi mqabıl da hçome dkibe dsaymolın Turkiya cali fnitho d’Şigur bu garbiyo du Iraq, u mırle “i sdirutho mşarewola heş ma zabne qamoye du qrobo cal Dacış b’Şigur. Ukıtlan ucdo esore di hawrutho udi methcadronutho cama grube Iraqoye mzayne ucama rişonaththe, ukito ste esore baynothayna bi sbutho di aykanoyutho d’Şigur. İda dlozım gıdhowe sdirutho bayn di PKK wa grube d’Alhaşd Alşacbi bnişo dmınfıq mqabıl dayna hçomo hatho dıkmisım mlarwal du Iraq, cal da tre gabe ha nişo kıtlın”.

U froso haroyo d’menyono ma grube mzayne d’Alhaşd Alşacbi bi fnitho d’Şigur, kıgurşo u zuhoro calu kyono da n’esore dkito bayn da grubani dıkmısnodi mu İran wu gabo da Falohe d’Kurdistan di PKK dkıtyo saqıbloyo l’Turkiya. Lfuth hın folitiqoye u İran wi PKK kıtlın ha nişo mqabıl du kboşo dı Turkiya l’racotho hathe bu garbiyo du Iraq. Bu yarho d’Şbot dşaficina u rişono d’Alhaşd Alşacbi Abu Fadak sımwole socurutho la qıryawotho d’Şigur. Bebzabno u rişono du koalisyon d’Alfatıh dkıtyo u gefo d’Alhaşd Alşacbi bu parlamento du Iraq Hadi Alcamiri bu mamlo dsımwole maglewole calu mabco dkıtla Turkiya dhıçmo cal Şigur u tlıbwole mi şultonutho d’Boğdod dşufco li harake mqabıl da fulhone dı Turkiya.

Lfuth mşalo bi hiğmonutho d’Ninwe, u froso hatho da grube d’Alhaşd Alşacbi b’Şigur kmadıl calu fhomo dkito baynothaye ubayn du gabo di PKK dıkmıtyaqın da grube Iraqoye gıdhowın laşane xıd şuro di mşaynutho mqabıl da hçome dı Turkiya calu garbiyo du Iraq.