BBC maglele d’Azerbaijan mahrawola hıdo ma citotho da Armınoye b’Qarabax

Bu buhono dsımle u froshezwo Britanoyo d’BBC, maglele d’Azerbaijan mahrawola hdo ma citotho dan Armınoye b’Qarabax, bıthır mıd tayımwo u qrobo dıbeynothaye.

İ cito Armınoyto shifowa kulonoyith, bıthır mıd i qritho d’Mexakavan fayitowa ışqad lu duyoqo d’Azerbaijan.

U gelyunoro du froshezwo Britanoyo d’BBC Jonah Fisher azzewo l’Nagorno Qarabax u mcaqabwole u qrobo dhawiwo ba 2020 bu zabno d’Azerbaijan bu snodo d’Turkiya kbışwolın u qlimo u mharabwolın mqabıl da hayle Armınoye. Bi netiçe da buhone dsımwole Fisher bnişo dımcaqıb i sbutho da farsufe dıkmivayciwo b’Qarabax, qadır dmagle calu hawbo hreno dsımwola Azerbaijan.

U gelyunoro mawdacle, da mşale d’Azerbaijan shıfwolın kulonoyith hdo ma citotho di qritho Mekhakavan. U mede dıkgorış u zuhoro, du tehriwo di citathe lo bu zabno da taxtuşe hawi, elo bıthır mıd tayımwo u qrobo bıthır mıd i qrithathe mafitowa lu duyoqo da hayle d’Azerbaijan.

Bu video dfrıswole Fisher, kımahwe u bınyono di cito bu zabno dmidowa i qrithathe ma hayle d’Azerbaijan-awkith bıthır mu qrobo. Bıthır u gelyunoro dacır naqla hreto lcayni duktho, elo hzele dlo fayışwo ulo hdo kefo di citathe bi duktho. İ naqla dımşayele mu polis cali sbutho di citathe, mıdle u polis u gelyunoro Britanoyo u mawfaqle mi qritho.

U gelyunoro naqla hreto mşayele me polis hreno cali citathe, elo u polis mdacele di cito hariwowa bu zabno du qrobo. An Armınoyo ğalabe naqlat grışwolın u zuhoro du kenşo Emwothoyo cali siyase dıkmaşyo Azerbaijan bu shofo da dukotho tawdithoye u marduthoye dkıtte b’Qarabax husrono.