Bı Ankara kmıbne bınyone lo qonunoyecala qawre da Armınoye

İ şultonutho d’Turkiya, lıkturyo a garme da Mşihoye dkıtne ba qawreste dmıthnohi.

Bi şawtho d’Ulus d’Ankara kmitacmır bşıkıl lo qonunoyo, bınyone cala qawre dan Armnoye uda Qatholiqoye.

Turkiya latyo inaqla qamyto dıkmacımro bınyone cala qawre u bethcatiqotho du catiqe da came şerşoye du athro dkıtne Mşihoye. Camgabe du tehriwo da qawre u du zebono da citotho makthabzabnoye ucdo’ste kmitacmır bınyone cala qawre dan Armnoye uda Qatholiqoye dkıtne b’hdo ma şawthawotho b’Ankara.

Bu hforo dıksaymo şirke dkıtyo bi duktho du tecmiro da bınyone, maglela da qawrani u dkito bınyono d’cito elo heş kımdawmi dhufri leşan dmacımri dukane cali arcathe. U rişonono du şutoso da ardiğle d’Ankara Tezcan Karakuş bi mawdconutho dhule lu tbocofroso mırle; U tecmirano latyo qonunoyo u mqabıl di noşutho’yo. U tecmirano klozım dmitakle metul dkito garme ba qawre u bınyono catiqo di cito bi duktho.

Karakuş mırle; Mqadamlan muraçat l’şutose, li wazirutho di mardutho udu turizim u ğer şutose dkıtlın ido bi sbuthathe, leşan dmaklın u tecmirano dlatyo qonunoyo elo hulucdo’ste kımdawım u hforo.

I dukthahte dıkmitacmır acla, idicoyo dkıtyo duktho da qawre u d’citotho mawxa a şutose dhulın u fsoso du tecmirano sımlın hawbo mqabıl du qonuno da 2863 du athro. Elo b’Turkiya dlayto b’vujdan kull mede kibe dhowe komır Karakuş. Aydarbo kibe u barnoşo dmacmır cal duktho dkıtyo mlitho garme-hathe kımthabto dlayto vijdan.