Bi cohnutho du yawmo da Neşe Falıhyotho dbritho 8 Odor, frısle HNB buyono u mırle; U mrodo d’8 Odor, remzo du ağono di athto’yo

U Mawtbo du Huyodo da Neşe d’Bethnahrin dfrısle adyawma buyono, mathkarle u yawmo d’8 Odor u mahkele cali lo kinutho dımşarela bu xloqo da sedre beyn du ğenso, wi athto aydarbo mıştacmıro bkull haqlo. Bıthır mıd mahto bu darğo da tre, camu şuşoto da sistame dkıtwın rakiwe cali hakimutho du gawro, dişo i athto u kle quma dlo mişawşıto, elo mıstacmılo xıd material, mzabno, qtilo, simo teçavuz u tıryo dlo sebyono. Ubu doro da 21 ubu şuşoto du teknoloji, mdawamle u cnufyo u ilo kinutho cali athto uban athrawotho faqire, qtil ban alfayo d’neşe u maşe siyasat acla dlo mişawşıto.

Ban athrawotho dkıtne demoqratoye, i sırto gawonoyto dcali athto latyo mşahlaftır, cal di athto naqla hreto mıştacmıro mu sistem, kmihır eba xıd material u kıluqyo cnufye nafşoye u guşmonoye. Hani zıttır me 100 eşne, hawi 8 Odor remzo du mrodo da ağone dhuwlın a neşe, wu yawmano kımamte lbole dbritho-dlo şawyutho da ğense laybe dhowe şuşoto uloste demoqratoyutho-awkith hol di athto dlo dmıtyo la zedqayda, i noşutho’ste lıkmiharıro.

HNB mırle; Adyawma i athto Suryoyto Othuroyto Oromoyto Kaldoyto Malkoyto Marunoyto dıkcayşo kull şıkıl dişutho bu athreydan ubi golutho, mawfaqla u qadar dımbayın ela lu xalyo bu ağuno dkobo. Bi falsafe du rişoneydan Mikhael Naim Hadodo, dmşatasle xtuto li irade uli hirutho di athto, kmitahwe mrodo caşino bkull haqlo-folitiqoyo, diplomatiqoyo, momunoyo u folhoyo, u mhalıq dawsat makthabzabnoye u xliq madraşto di athto b’ışme d’HNB. A neşe dımşawşıti qadiri dmaydi u dawro dıknofıl aclaye ba şutose uba wahde mşahlıfe d’MUB.

HNB komır; Adyawma dkıtna ağuno da Sohde, kıcayşina kull kewo u casqutho di qale dhulın a neşe b’britho, calathe 8 Odor hawi remzo du mrodo leşan kenşo dhowe şawyo dıkmaxlıs i umthaydan u cameydan wa came dişe kulle. Hol di athto dlo nufqo mu telolo du gawro u dhowela maftahfemo lawğıl u larwal, laybe u cameydan dmote ldarğo dımdabır ruhe. Calathe ktulbina lkull athto b’britho-dilonoyith li athto du cameydan, du yawmo da neşe falıhyotho dbritho howe brixo. Bı haymonutho kımmina, 8 Odor gıdmante lbolayna dkull yawmo, klozım dhowe yawmo hreno du mrodo udu ağuno di athto, du tcono di otho da Sohdeydan. Tihe ağuno di athto! Tihe darbo du mrobo udi hirutho! A Sohde lo kmaythi!