Bi maqırhonutho dhule İbrahim Murad mawdacle du sistem konfedraloyo kımmathıl u şroyo towo dkulle l’Lebnon

U rişono du gabo du Huyodo Suryoyo Tibeloyo d’USUP İbrahim Murad, mawdacle du sistem konfedraloyo kımmathıl u şroyo towo dkulle lu kriz qaşyo dıkşofıc ebe Lebnon bu maşıqlano ducdo, dilonoyith bu zabno dkımnase u gabo d’Hizballa dmarku sistem tawdithoyo idyolojik mşawhıroi u masro cami tahrazto dkıtle u athro Maşılmono du İran.

Bu zabno dlıkqıdri a’rişone folitiqoye d’Lebnon dımşatsi şultonutho hathto dkiba dsaymo şıhlofe şerşoye b’gawıd du athro, u hathe ste mfothıd da tırpılyotho dıkmahıtlın u gabo d’Hizballa dkıtyo u kaboşo du fusqono folitiqoyo d’Lebnon, mşarele ucdo dnıfqi liholo a’qole dkımtalbi dmitarku sistem federaloyo yaste konfedraloyo laşan dmitaxlıs Lebnon ma krizayde.

Bi qadmoyutho da qolani, u rişono du gabo du Huyodo Suryoyo Tibeloyo d’USUP İbrahim Murad yo, dnaqla hreto mkararle i qroytayde dmişatıs sistem konfedraloyo b’Lebnon, cal dkımmathıl u şroyo towo dkulle dkibe dmaxlıs u athro mu krizayde u folitiqoyo u momunoyo, cal dhawi yasiro du rejim idyolojik Maşılmono du İran.

Murad bi maqırhonutho dıfrısle bi dafayde du nawlo, sımle hçomo qaşyo calu gabo d’Hizballa dıktofık Lebnon lafu shofo, u mırle “laybe fayış dhowe ciyeşe mşawtafto cam kaboşo dıflıhle hani ışne b’lalyo u bimomo, laşan dımşahlıf i fotho mdinoyto d’Lebnon, udhowe nuqazto di dhılmiye, di cıtmo, du fasad, du shofo, udi marıhbonutho bışmıd di tawditho ubışmıd du mrodo saxta lo şariro. Murad mawdacle ste du prensib di ciyeşe mşawtafto azzeyo luxalyo camu gabo dkobıc dımşahlıf Lebnon l’athro nacmo b’gawıd d’athro dhowe masro cami tahraztayde i marıhbonitho.

Camgabıdathe, Murad mawdacle da rejme catiqe lıfayşi ucdo şawye la nişe da came du madınho mescoyo, u thımle ste u rejim qentrunoyo d’Lebnon dmaslamle u camo wu athro l’grub marıhbono nxilo dıtrele Lebnon dhowe yasiro lu athro Maşılmono du İran.

Meqım mathe ste, u rişono du gabo d’USUP İbrahim Murad makadwole dıklozım dmişatıs gbino folitiqoyo morıd tarmitho qrihto u şfitho, bnişo dmisarhıb bu texliso d’Lebnon wu camaydan mu athro kaboşo du İran.