I sunados mqadaşto gawonoyto di cito Suryoyto Ortodoksoyto d’Antiyuxiya layimo bu qentrun fatıryarxoyo dkıtyo bi fnitho di Catşane bu athro d’Lebnon

CATSHANE, Lebnon – Yawme d’Arbıco dşaficina ba şoce dsafrayto, i qadişutho du fatıryarxo d’Antiyuxiya udkule madınho Mor İğnatiyos Afrem Trayono, sımle ruşmoyith u futoho di sunados mqadaşto gawonoyto di cito Suryoyto Ortodoksoyto bu qentrun fatıryarxoyo dkıtyo bi fnitho di Catşane b’Lebnon. 

La ytawyotho di sunados kmıştawtıf i tubthonutho du mafıryono du Hınd Mor Basilyos Josef wa hsayo mcalayo rişone da marciyotho Suryoyotho d’athın ma n’athrawotho mşahılfe dıbritho laşan dıdırşi a’sebwotho di cito. 

Bu mamlo du futoho, fatıryarxo Afrem sımle qroyto li hdoyutho, uli dbihuthnafşo di haymonutho bu nfoqo mqabıl da casqıwotho dkito bu dorano ducdo. I qadişuthayde dım’akadle i ulsoyutho du nfoqo du moro li yortutho şlihoyto catırto di cito Suryoyto, sımle ste qroyto la mhaymne dnıfqi moro lu leşono Suryoyo ula cyode citonoye. Bebzabno, fatıryarxo Afrem makadle i ulsoyutho dmınfıq moro li hiyoyutho di cito bu taro da casqıwotho di cılmoyutho. 

Bu taro du mamlayde cala krize dkito bu maşıqlano ducdo, i qadişuthayde mşalatle bahro cali casqutho da Mşihoye bu madınho mescoyo dilonoyith b’Suriya, b’Lebnon, bu Ciraq uba n’arcotho mqadşe. Ucıl ma casqıwotho dkito, fatıryarxo Afrem mqalasle i msaybıronutho da mhaymne u makadle di cito b’fusqono kamiloyo dımqadmolın snodo ruhonoyo u kenşoyo, u mırle “klozım dhuyo i cito nuhro dıkmabhır bi cıtmo, u malho dkobo lıbritho i basimutho du mgalyun mqadşo”. 

Camgabıdathe, Mor Afrem Trayono mathkarle u tlithoytube mnohnafşo mafıryono Mor Basilyos Tumas Qadmoyo wi mşablonutho şarirto dhawiwole li cito du Hınd. Ubebzabno mhanele u mafıryono hatho Mor Basilyos Josef, u mawdacle dkıtle tuxlono rabo ebe dımdabır i cito du Hınd bi nıcme d’Aloho.