Blinken bi itawto cam Netanyahu m’akadle, dhem a İsarloye u hemste a Fleştoye klozım dmitaklen u cnufyano dıkmdawım beynothaye

URIŞLEM – Bu mamlayde u waziro di baroyutho d’Amerika Antony Blinken mırle; İ qroyto lu tloyo du hayif mqabıl da farsufe dlatte htitho, latyo şroyo du qetro. Ahna bkull meltho qşitho, kıkurhina u cnufyano a 2 gabe klozım dtucni i mşaluthathe leşan dmitaklın a hçomani a barbroye dıkmkalfi a haye da mdinoye.

A melani d’Blinken dsimi athmıl b’Tel Aviv mawdacle’ste, du darbo du şlomo-u darbo ihidoyo’yo lu dactith. Blinken hawile bıthır ytawto camu rişwazire Benyamen Netanyahu u adyawma’ste laqi u rişono da Fleştoye Mahmud Abbas.

Blinken mırle; Woşington heş masırto’yo bu şroyo du krizano bu darbo du terkiwo d’2 athrawotho şarye. Leşan u teqwiyo di mşaynutho d’İsroyel, klozım dmıbne geşre bu qlimo u calathe huwlan yuqro lu qyomo d’Abrohom, bnişo dhowe esore beyn İsroyel udan athrawotho Caraboye.

Netanyahu’ste mfanele, d’İsroyel hadırto’yo dmarwıho a esorayda u mırle; Ono’ste kmıtyaqano, du terwiho di huktho du şlomo, u fulhono qariwo beyn İsroyel wa Caraboye-gıdmdcadarlan dmotina l’şroyo cama şbobaydan a Fleştoye. Bebzabno a rişone tawdithoye da citotho da Mşihoye b’Urışlem’ste tlıblın ma İsarloye uma Fleştoye dlo maqşın u cnufyo wa rdufani d’zayidi bu athro.