Britania maqimla minyono d’tedbire dmahti cal Suriya

LONDRA – I şultonutho d’Britania mawdacla dmaqımla athmıl a’tedbire dmahtiwo bu zabno du rejim d’Başşar Alasad cal 24 şutose u sicotho, baynothaye u bank qentrunoyo dkıtyo bı Darımsuq. 

I wazirutho di xazine d’Britania bu buyono dıfrısla bi sbutho du hethotho di lohitho da tedbire dmahti cal Suriya mırla “24 şutose Suriye maqimi mi lohitho, u makle u teglido da zuzaththe”. 

Mi lohitho da tedbire maqım şutose dıkfılhi bu haqlo du energy, du nqolo udu momuno, baynothaye a’xtute du fyoro d’Suriya, u şotoso gawonoyo du nafto wu bank di zaricutho udi tagorutho d’Suriya. Elo bebzabno heş kito ba mowat dı tedbire dmahti cal farsufe u şutose b’gawıd d’Suriya mi xasra d’Britania. 

Britania bu yarho dşaficina maglewola liholo dkıtla tahrazto dmaxifo a’tedbire dmahti cal Suriya bu zabno du rejim catiqo d’Alasad. U tahlufo du waziro di baroyutho d’Britania Steven Duti mırwole “u texifo da tedbire kıtle u nişo dsonıd u camo d’Suriya bu bnoyo du athro m’hatho, ubu teqwiyo di mşaynutho wi şalyutho”.  

Bebzabno, Duti mawdacwole di şultonutho d’Britania b’fusqono kamiloyo dmaydo hşowo m’Alasad uma şorikayde mqabıl da gunhe dsımlın bhaq du camo d’Suriya, u makadwole ste dgımdawım u teglido da zuze wu mnoco du hzuqyo dmahıtwo cala hadome du rejim catiqo du Bacıth.