Bu athro d’Almanya udu Swed, maqım athmıl slawotho u teşmışyotho cali ruho di sohıdto du Mawtbo Umthoyo d’Bethnahrin d’MUB İzla Neriman Özgun Rucyo

ALMANYA/SWED – Bıthır mu fuqdono dhuwle u Mawtbo Umthoyo d’Bethnahrin bi egarthayde dla hadome ula noqufayde bkull duktho dbritho leşan dnufqi moro li hadımtayde di Sictho di Rişonutho-i Sohıdtayda İzla Neriman Rucyo, hiw ba salone uba citotho mkono lu camaydan’ste, dımqadım a buyoayde u dmathkır i ruho di Sohıdto. 

Mbayn da citotho d’Almanya dmathkarlın i sohıdto İzla, kito i cito d’Mor Malke bi mditho dı Delbruk, i cito d’Yuldath Aloho bi mditho dı Paderborn, i cito d’Mor Luko bi mditho d’Gutersloh, i cito d’Mor Yacqub Dasruğ bi mditho d’Göpingen uba citotho Suryoyotho dkıtne bi mditho d’Verl ud’Hamborg.

Ba mamle dsımlın a’kohne da citotho, mahkelın cala haye di sohıdto İzla ucalu tacbo dhula laşan du camaydan dıkhoye bu athro da n’abohotho, u mawdaclınste du sohdo latyo balhude u farsufo dıkmaxır u admayade, elo kitoste sohde dıkfırşi a’hayaththe laşan di mşablonutho du camaththe, ukobın ağuno hulu nafas haroyo laşan du camaydan dmote la zedqayde.

Bebzabno, ba mamle dsimi ma kohne mawdıc ste di sohıdto İzla hawyo i athto qadmoyto dıkmıştawtıfo lu ağuno di hirutho du camaydan bi rişonutho du mawtbo umthoyo d’Bethnahrin d’MUB. 

Camgabıdathe, mathkıro i sohıdto du ağuno umthoyo d’MUB İzla Neriman Rucyo bi cito d’Mor Aho bi mditho d’Örebro du Swed, u tlib rişomo basimo mi iqarthayda u ma hawronayda du ağuno. Ubebzabno u kohno di cito mawdacle dgıdmitaqın teşmışto cali ruhayda yawme d’Huşabo dıbqamuthayna.