Bu yowmo du duxrono da 106 eşne du Sayfo mtayıb turgomo bi mdito d’Södertelje bu Swed

Bu duxronano da 106 eşne du Sayfo, mtayıb bi mdito d’Södertelje du Swed turgomo bu benyono du froshezwo d’Suroyo tv.

U turgomano, dımtayıb m’şutose frişe du Mawtbo Umthoyo d’Bethnahrin-MUB, maczım’ste ele malole frişe dmahkelın cala celotho dsim u Sayfo wu tathir dtrele calu camaydan.

Bu salon da hage bu bınyono du froshezwo d’Suroyotv, mtayıb athmıl turgomo bi cohnutho da 106 eşne du qtolğenso mayiro dsımwo calu camaydan mi mamlaxtho da Cuthmanoye. U turgomano mtayıb mşawtıfo mu Huyodo da Neşe u fırco du Swed, mu Huyodo Suroyo d’Urifi, mu froshezwo umi Bethmardutho d’Bethnahrin d’Södertelje.

Bu panel du turgomano kıtwo Besim Aho, kathıwto Anna Malle, Danho bar Murad u Fahmi bar Gallo u xıd mathlono d’MUB’ste, kıtwo Yahkub Nuhomo dımdabarwole u turgomano, dhadırle’ste mınyono man abne u bnotho du camaydan da fınyotho dhedor Stockholm. Bu mamlayde, Nuhomo m’akadle du turgomano latyo belhude duxrono da Sohde du Sayfo, elo droşo’yo leşan dmıfhım u qtolğensano u dmitafhım la nacime ula jilat dothe’ste.

Abun Xuroyo Nucman Use dhadır bu yawmano, maqımle teşmışto cali ruho da Sohde. Bu şuroyo Bessim Aho dkıtyo soscionom u mşalo bi karxutho d’Södertelje, bu mamlayde kali siyase dmaşelwola i mamlaxtho da Cuthmanoye cala qalilotho u aydarbo mnaselın bişıkıl sistematik dquşci u camaydan, an Armınoye wa Pontusoye uda tahrazyothani heş hol adyawma kımdawmi calu camaydan.

Danho bar Murad dflıhle bi sictho du yulfono da madraşyotho du Swed u dkıtyo mqadmono b’Suroyotv, frışle duktho cali trauma dcayış u dheş hol adyawma kıcoyış u camaydan mu Sayfo dan 1915 u huwle mathle, aydarbo ğer came qadiri dnufqi mi traumathe u mşawşıti bıgawe du kenşo. İ kathıwto Anna Malle dmıştawtafla bu darbo du nawlo lu turgomano, mahkela cala kthowe dfrısla ucala buhone dsımla calu dawro di athto bu zabno du Sayfo.

Fahmi bar Gallo’ste mahkele cala qatle dhawın b’Mıdyad ba 90’yat dheş holucdo kmitawdıc da qatole dan abne du camaydan latne idice. Lu turgomano’ste mqadım mimre me omuro George Şamcun u Josef Sawık, ubu huthomo’ste hiw dawro la hadire dobın a hzayothathe u dımşayli a şwolathe.