Çelik mqadamle rmoyto cala hjome tuxmonoye dkowın cala bethqbure mşihoye b’Trabzon

U qoyumo du cameydan bu parlemento d’Turkiya Tuma Çelik mqadamle rmoyto lu waziro di gawoyutho d’Turkiya dıkgorış u zuhoro cala hjome tuxmonoye dkowın cala bethqbure mşihoye dkıtne b’Trabzon.

 Bi rmoyto u qoyumo kımşayıl en i wazirutho mıdla tadbire aw ftıhla bethdino bhaq da hcome dkowın cala citawotho wa bethqbure da mşihoye dkıtne bu athro.

Bi rmoyto dımqadmole u qoyumo Suryoyo Tuma Çelik grışle u zuhoro cala bethqbure di cito Latinoyto Qathuliqoyto dkıtyo b’Trabzon d’Turkiya u dkowe hjome tuxmonoye qaşye acla. Bi rmoyto u qoyumo komır; Bu zabno du cufoyo, hjımwo ba zabne haroyani cal farsufe dmıştawtafwolın lu cufoyo u mawqadwolın u Slibo dkıtwe calu qawro.

18 bu yarho d’Konun u haroyo dı şafıcina, bu zabno du cufoyo naqla hreto hjımwo cali cito ba kalbe u mazcaqwolın tekbir-dkıtyo remzo di Maşılmonutho. Bebzano u dayroyo di cito d’Yoldath Aloho hjımwo acle u qtılwo 5 Şbot da 2006.

Mawxa u qoyumo du cameydan Çelik bi rmoyto dımqadmole lu waziro di gawoyutho Suleyman Soylu kımşayıl mene; en mabde buhono bhaq da hjomani, yaste mosık noşo? Bhaq du hjomo dcali cito d’Yoldath Aloho msik thimoye?

Ha ma şuwoleste; en u waziro kıtle tahrazto dmoyıd tedbire mqabıl da hjome dıkmisim cala citotho ucala botay tawditho da Mşihoye. Ba 3 eşne haroyani, en ftih bethdino mqabıl da farsufe dsımlın hawbe  di nafre.