Cimad Salem Jajjo sımle socurwotho la şutose yulfonoye di hiğmonutho d’Ninwe

U mdabrono gawonoyo du yulfono Suryoyo bu Iraq Cimad Salem Jajjo, sımle socurwotho la şutose yulfonoye di hiğmonutho d’Ninwe.

Ba socurwothayde, Jajjo drışle aydarbo kibe dmitahwe snodo la ferco du yulfono Suryoyo b’Ninwe.

Lfuth a’fuqdone dhule u waziro di tarbitho du Iraq Cali Hmed Mıxlıf bi sbutho dmicaqıb u yulfono bu darbo du nawlo, U mdabrono gawonoyo du yulfono Suryoyo bu Iraq Cimad Salem Jajjo kımdawım a’socurwothayde la şutose yulfonoye di hiğmonutho d’Ninwe uda qastrat d’hedora.

Bu tarano, Jajjo sımle lumıhreno socurutho li mdabronutho di tarbitho di hiğmonutho d’Ninwe, u laqi u mdabrono gawonoyo Yusıf Faraj, ubi ytawtathe driş aydarbo kibe dhowe methcadronutho mşawtafto bayn da tarte mdabrınwotho, bu snodo da ferce du yulfono Suryoyo b’Ninwe.

Bebzabno, Jajjo sımle socurutho lu mcadrono du mdabrono gawonoyo da sebwotho du teknik di tarbitho d’Ninwe Xaled Şahin, ubıthır mathe ste sımle socurutho lu ferco du yulfono Suryoyo di tarbitho d’Ninwe u laqi u mdabrono du ferco Samir Yuxanna, bi mıştawtfonutho da mşale da şutose du yulfono Suryoyo udi tarbitho d’Bağdede.

Meqım mathe ste, u mdabrono gawonoyo du yulfono Suryoyo bu Iraq Cimad Salem Jajjo sımwole yawme d’Huşabo dşaficina socurutho li mdabronutho di tarbitho d’Bacşiqa, u laqiwo u mşalo di mdabronutho Riyad Hamuka wu mşalo du ferco du yulfono Suryoyo Cimad Jıbrayel. Bi socuruthathe drışwo aydarbo kibe dmicaqıb u yulfono bu darbo da dafe du nawlo.