13/04/2022

CIRAQ: Dayira du yulfono Suryoyo hawila lqoyto cam a malfone du leşono Suryoyo b’Nuhadra

U ferco di mdabronutho gawonoyto du yulfono Suryoyo di mditho d’Nuhadra bu garbiyo du Ciraq, mtayabla lqoyto cama malfone da şbile du leşono Suryoyo udi tarbitho tawdithoyto Mşihoyto. Bi lqoytathe, driş u maşıqlo hatho du yulfono wa casqıwotho dıkloqın a’malfone.

13/04/2022

NUHADRA, Ciraq – Bu taro di tahrazto şatonoyto da 2022 di mdabronutho gawonoyto du yulfono Suryoyo du Ciraq, u ferco du yulfono Suryoyo bi mathlonutho di wazirutho di tarbitho d’Nuhadra, mtayable athmıl lqoyto cama malfone du şbilo du leşono Suryoyo udi tarbitho tawdithoyto Mşihoyto dıkmitaqrın ba madraşyotho dkıtne masre cami mathlonutho di wazirutho di tarbitho d’Nuhadra.

Lu knuşyano mıştawtafle i mdabronitho di mathlonutho d’Nuhadra Huda Markuz u mşalo du ferco d’Nuhadra du yulfono Suryoyo Viyanki Xuşaba, a’mdabrone da şbile du leşono Suryoyo udi tarbitho Mşihoyto wa fqide du yulfono Suryoyo u ferco d’Nuhadra.

Bi lqoytathe, midi a’renye wa hzayotho dkıtlın a’malfone, udrişi a’qetre u casqıwotho dıkloqelın u maşıqlo yulfonoyo du leşono Suryoyo udi tarbitho Mşihoyto, u aydarbo kibe dmiqafelın şroyo.

M’gabo hreno, Markuz bu mamlo dsımla la hadire makadla di mathlonutho di tarbitho d’Nuhadra, hadırtoyo dsındo u şutoso du yulfono Suryoyo, a’malfonayde wa fqide kulle dıkfılhi ebe, bnişo dmışroyi a’qetre dkıtlın ba fulhonaththe, ud’makşır u maşıqlo du tewlifo du leşono Suryoyo udi tarbitho Mşihoyto b’Nuhadra.